WILLEMSTAD.- Un bia mas trahadónan di Campo Alegre a mustra nan preokupashon pa desaroyonan den e kompania. E trahadónan den un karta habri ta menshoná nòmber di diferente persona ku sea ta representá di doñonan òf ta e doñonan di e resort. Ta indikando ku ta duna e trahadónan un trato malu i kada bia ku trahadónan buska manera di organisá nan mes den un sindikato e abogado di e kompania lo ta frustra e intentonan aki. EXTRA a buska tur manera pa haña kontakto ku abogado Loth i tambe Campo Alegre pero no ta logra. Sindikalista Kenneth Valpoort den un reakshon ta bisa ku nan ta representá e trahadónan pero nan no a na altura di último desaroyonan. Loke si Valpoort por a bisa ta ku e abogado Loth no ta atendé ku e sindikato ni na telefon ni personal.

Den nan karta e trahadónan ta lamentá kon un hòmber i muhé ku tabata pareha awor aki ta bringa ku otro pa kibra Campo. Nan ta papia di kòmplòt di e muhé ku e abogado pa ruina e resort. Trahadónan ta bisa ku nan a purba na aserka sindikato Horecaf na vários okashon pero e abogado no ke pa nan tin niun kontakto ku e sindikato. Aparentemente asta ta asina ku lo a yega di ofresé sierto trahadónan sèn pa asina nan por a sali for di e sindikato. Trahadónan ta sklama pa yudansa. Nan ta mira kon tiki nan koleganan ta pèrdè trabou pero abogado di e kompania ta logra tapa tur kos i asina a laga e trahadónan kai chikí. Manera indiká kaba EXTRA a hasi bastante esfuerso pa haña un komentario di parti di gerensia di Campo Alegre pero nos no a logra.