WILLEMSTAD. E trabou ku empleadonan di Curaçao Medical Center ta hasiendo aktualmente ta inmenso. Hopi preshon ku e tantísimo kasonan di pashèntnan ku COVID ku ta drenta e sentro. I p’esei nos ke pone lus awe riba algun di e empleadonan ku ta hasi un trabou inkansabel huntu ku henter e tim ku nan ta traha kuné. Lamentablemente nos no por publiká henter e tim pero nos ta manda un aplouso pa nan. Koleganan na CMC trahando duru riba pia.  Dia’den dia’fo.  Risibiendo mas i mas pashèntnan di COVID ku ta drenta hòspital tur dia.  Nan ta pone nan mes un banda, nan emoshon un banda, nan famia un banda, nan salú un banda.  Pa sirbi Kòrsou.  Kuida Kòrsou.   Nan tei pa bo. ‘Nos tei pa bo. Pero por fabor, Yuda nos, yuda bosnan’, ta e petishon di e empleadonan di CMC. Pa loke ta e mensahe ku a bai rònt ayera pidiendo yudansa di afó, e hefe di departamento di komunikashon ta bisa ku esei tabata algu interno. Na momentu ku mester di yudansa di boluntarionan nan lo laga sa esaki di un manera mas strukturá.