Usando NOW pa argumento Damen a retené 25% di salario di Trahadónan

WILLEMSTAD.-Trahadónan di dòk a pone trabou abou awe mainta. EXTRA tabata na porta di dòk pa skucha di Trahadónan i nan dirigentenan sindikal. Informashon ku EXTRA a risibi na e sitio ta indiká ku Trahadónan a tuma nota ku gerensia di Damen a disidí di forma unilateral pa retené 25% di salario di empleadonan. Dirigente sindikal Dennis Daal (PWFC) a splika ku gerensia di Damen a usa e preteksto ku nan no a haña sèn di NOW di gobièrnu i p’esei nan no por paga salario kompletu. Manera EXTRA a informá kompanianan ku den lunanan anterior tabata hasi petishon pa bini na remarke pa haña sèn di e fondo NOW no a haña nada pasobra kaha di plaka di gobièrnu ta bashí. Gobièrnu di Kòrsou no a hana e tranche di plaka komo finansiamentu di Ulanda.

Pues gerensia di Damen a disidí riba nan mes pa pa kòrta for di e plaka di fakansi i tambe di dianan di fakansi. E dirigente sindikal a sigui bisa ku na momentu ku a hala atenshon di gerensia, mustrando ku no por hasi asina e gerensia a komprondé i a bisa ku nan e paga e sèn bek.

Damen ke paga bèk pero ta parti esaki den 3x tranche, unu na yüli, otro na ougustus i e último na sèptèmber. E retenshon di 25% for di e Trahadónan a kousa hopi problema pasobra hopi trahadó a prepará pa atendé asuntunan di skol òf a plania kaba pa bai gosa di fakansi ku nan famia. Riba e pregunta di EXTRA e dirigente sindikal a duna di konosé ku ta trata alrededor di 250 pa 300 mil florin ku Damen a retené i ke paga bèk den 3x bia. Trahadónan ta eksigí nan sèn awor aki.

Damen ke negoshá, i den esei Damen a proponé pa duna e Trahadónan 2 dia aserka, pasobra loke a retené ta representá 5 dia di trabou i komo tal nan ke duna dos dia èkstra, pero Trahadónan ke nan sèn bèk awor.