WILLEMSTAD.-Trahadónan di e astiero Damen a tene un ‘walkout’ awe mainta despues ku na a komprondé ku gerensia di e kompania a apliká pa e areglo di NOW. Trahadó ku EXTRA a papia kuné ta bisa ku awe mainta mayoria di e koleganan a bai edifisio prinsipal di e dòk pa haña klaridat di gerensia.

E preokupashon ta grandi serka e Trahadónan debí ku nan ta mira ku tin basta trabou den dòk i tòg nan ta tende ku e kompania a apliká pa yudansa di Gobièrnu pa paga salario. Nan ta komprondé bon kla ku si e kompania apliká pa NOW ta nifiká ku Trahadónan lo kobra ménos. Ta bon konosí ku ora un kompania apliká pa e areglo di NOW, e Trahadónan tambe mester entrega parti di nan salario.

No ta posibel pa haña informashon di Damen pues ta loke e Trahadónan i sindikato indiká komunidat mester konta kuné. Entretantu dirigentenan sindikal di PWFC, riba insistensia di Trahadónan, a bai papia ku gerensia di Damen.

A kòrda EXTRA ku ainda tin un dòk ku a senk algun tempu pasá i no a tende mas, i despues di eksploshon i Trahadónan ku a pèrdè nan bida durante trabou bou di awa te awe no tin klaridat. Inspekshon di labor tambe nunka mas tin niun informashon. Mas detaye den edishon di EXTRA.