Update;

Trahadónan di Dòk a bai paden bèk. Mientrastantu nan ta pendiente di palabranan di nan dirigentenan sindikal.

...Situashon birando tenso na altura di Kaya Don Martina awor ku Trahadónan di Damen a subi e kaya prinsipal i ta stroba Tráfiko normal riba e kaya. Tin polis na e sitio pero no ta logra konvensé e Trahadónan pa kita for di e kaya pa asina Tráfiko por sigui su ruta. Tráfiko ta mal pegá for di Biesheuvel i tambe di e otro banda. Tur hende pegá den Tráfiko riba Kaya Don Martina sin por kumpli ku nan obligashonnan.

Tur esaki ta debí na situashon di mal kontentu di e Trahadónan di Damen. Tin un preokupashon pa hendenan ku ta pèrdè trabou na Damen i esei a pone ku Trahadónan a kita for di porta di Damen i bai na e krusada di Kas di Korte i Aqualectra.

WILLEMSTAD.-Trahadónan di Dòk a blòkia entrada prinsipal di e astiero awe mainta, despues ku ayera nochi mas ku 20 trahadó a haña karta di retiro. Tráfiko tabata kompletamente sera for di e entrada na Kaya Don Martina pa subi Dokweg. Tin un pakete di retiro, den kua e kompania ta ofresé algun benefisio komo areglo di retiro. Kada pakete di retiro ta diferente, e ta dependé di e kantidat di añanan di servisio di kada trahadó.

Pa algun tempu kaba tin un situashon di hopi preokupashon. EXTRA a tuma nota na momentu ku dirigentenan sindikal ta splika Trahadónan ku ta bon pa bai skucha loke e kompania ke ofresé. A hasi apelashon na Trahadónan pa bai skucha loke Damen ta ofresé, no firma nada, pero trese e oferta pa sindikato i asina sindikato por yuda e trahadó evaluá e oferta di retiro. Kada trahadó ta disidí pa nan mes.

E pregunta a surgi kiko lo pasa si un trahadó rechasá e oferta di Damen. Dirigentenan sindikal a splika ku den kaso ku e kompania ke kuminsá un proseso di retiro e mester bai SOAW i esei ta dura por lo ménos 6 siman. Miéntras ku e proseso na SOAW ta kanando e trahadó den servisio i mester sigui kobra.