WILLEMSTAD. - Trahadónan di Girobank ketu bai ta warda riba partisipashon ofisial interno pa asina nan sa kiko ta bai para di nan futuro. Ta den prensa so ta tuma nota di sierto informashon, asina un trahadó a splika EXTRA.

Resientemente Banko Sentral a saka un komunikado bisando ku terminashon di e operashonnan di Girobank ta andando i gradualmente lo sera e sukursalnan di e banko i saka e ATMnan for di servisio. Segun EXTRA a komprondé te ainda esaki ta e úniko informashon ku e trahadónan tambe a haña via prensa.

No tabatin informashon direkto di parti Banko Sentral riba nan futuro i e trahadónan sa ku no ta tur di nan por haña empleo den e entidat nobo ku ta bai lanta pa manehá terminashon di e banko, esta GI-RO Settlement Holding BV.

Banko Sentral huntu ku gobièrnu i GI-RO Settlement Holding N.V. a firma un akuerdo dediká spesífikamente na manehá i kobra e fiansanan pendiente di Girobank i usa e entradanan akí pa hasi pago na e depositantenan di Girobank. GI-RO Settlement  lo usa e sèn ku gobièrnu ta fia serka Hulanda pa por paga e depositantenan di Girobank nan saldo mas lihé posibel.

Ta premirá e fiansa aki lo paga saldo kompleto di gran mayoria di e mas ku 2000 depositantenan ku tin sèn ainda riba un kuenta bankario afektá pa e moratorio ku a drenta na vigor for di 2019.

GI-RO Settlement lo usa e ingresonan ku e lo optené ku maneho i kobransa di e fiansanan di Girobank pa paga e fiansa di Hulanda bèk. Despues, si resta sufisiente fondo, GI-RO lo hasi pago na e sobrá depositantenan tambe.