WILLEMSTAD.- Tradishonalmente e di dos djasabra di luna di òktober, ta konmemorá e dia di trahadónan di prizòn. Normal esaki ta keda konmemorá i selebrá durante henter un siman, kaminda vários aktividat ta keda organisá pa trahadónan di prizòn i tambe ku oportunidat ku tur kolega ku ta traha den prizòn, lo por topa otro koleganan di Boneiru, Aruba, St.Maarten i Sürnam, pa asina por interkambiá i sosialisá.
E aña aki e siman di trahadónan di prizòn a tuma lugá aki na Kòrsou durante dianan 7 pa 13 di òktober i a konta ku representashon di trahadónan di prizòn di e paisnan ariba menshoná. E aktividatnan ku a tuma lugá durante e dianan tras di lomba tabata entre otro: kompetensia di tiru, vòlibòl i di kushinamentu i tambe tabata tin un “tour” den paranda bùs i hopi aktividatnan mas sosial.
Pa ku e siman di trahadónan di prizòn a dediká e siman kompleto na 3 kolega di SDKK, pa nan labor prestá i añanan di servisio na prizòn. E 3 trahadónan aki tabata: sr. Marshal Jansen, sra. Jamlia Pietersz i sr. Eugene Bernadina.
Pa ku e dia ofisial di trahadónan di prizòn tabata tin un Santu Sakrifisio di misa na Misa di Santa Famia, siguí pa un marcha di tur e diferente koleganan di prizòn uniformá den kaya di Otrobanda i a finalisá den oranan di anochi den ambiente festivo ku un fiesta. Gerensia di SDKK ta sumamente kontentu ku tur e koleganan di diferente pais ku a partisipá na e aktividatnan ku a tuma lugá durante henter e siman di trahadónan di prizòn aki na Kòrsou.