WILLEMSTAD. - Apesar di tenshon na trabou, trahadónan di Selikor for di 4’or di mardugá a start ku limpiesa den sentro di siudat, esaki ta loke ku e trahadónan mes a duna di konosé na EXTRA.

Un biaha mas Pueblo di Kòrsou a bai Sentro di Siudat pa selebrá kambio di aña 2016 pa 2017. Tabata reina realmente un tremendo ambiente i esaki ta un di e ambientenan ku sikiera un biaha den bida, mester bira parti di eksperensia di e pueblo di Kòrsou.

Despues di e selebrashon, trahadónan di Selikor tin hopi trabou, pa motibu ku e loke ku ta keda atras ta realmente un resultado di un selebrashon tur afó.

Trahadónan di Selikor for di 4’or di mardugá tabata na Selikor i a prepará tur kos pa bai sentro di Siudat i pa 5.30 trabounan a start pa hasi sentro di Siudat limpi limpi.

E trahadónan a duna di konosé ku nan ta hasi nan trabou ku amor, pero nan ta spera ku gerensia e aña aki por ta mas serio pa kumpli ku nan CAO ku ta stanká i tin un 1500 florin ku nan mester a haña ku ainda no tin nada ta pasa pa nan haña e plaka aki.

Pues pa sigui tene e ánimo aki na haltu, e trahadónan ta di opinion ku nan ta stèns ku gerensia di Selikor lo kumpli ku nan deber mas pronto posibel.