WILLEMSTAD.- Redakshon di Extra a keda aserká pa siudadanonan ku a señalá un situashon ku tin den Ontarioweg kaminda ku ya pa mas ku 2 siman tin un awa di kloaka ta kore riba kaminda.

Nan a duna di konosé ku e awa akí ta sali for di un kloaka ku tin riba kaminda pero e awa di den e roinan tambe ta produsí holó desagradabel.

E situashon akí ta pone ku vários persona ta evitá di frekuentá den e área ku konsekuensia ku e komersiantenan ta pèrdè benta. Di otro banda, e trahadónan di Ontarioweg konosí komo "Hanchi Makaku" tur dia di nobo tin ku laborá den un situashon a-higiéniko ku tur konsekuensia ku esaki por tin kuné.

Siudadanonan ku ta traha den e área ta hasi un supliká na OW pa laga remediá e situashon akí mas pronto posibel.