WILLEMSTAD.- Un delegashon di sindikato UGTK-Cadmu a bai sede di gobièrnu di Kòrsou unda a topa ku minister presidènt i minister di Planifikashon Urbano (VVRP). E grupo tabata na un manera masha respetuoso, pero por a sinti un emoshon grandi i pisá di parti di e trahadónan pa e forma trankil pero sumamente preokupá ku nan a ekspresá.

Wendell Meulen di Cadmu a bisa ku nan a haña un karta di gobièrnu ku ta indiká ku no por prolongá e pèrmit di operashon (AOC) di Insel Air. E sindikato i e trahadónan ke haña klaridat si awor ku e karta aki sali ta nifiká ku mester kuminsá e proseso di AOC kompletamente di nobo òf si por sigui kaminda nan a yega kaba. Meulen a mustra ku Insel ta kanando e proseso di AOC pa algun tempu kaba i ta asina ku tin algun parti ku ta kla kaba. UGTK-Cadmu ta bai reuní ku e invershonistanan i den e kuadro ei ta importante pa haña e klaridat nesesario.

Otro preokupashon ku nan a ekspresá ta ku e aktual direktor di departamentu di aviashon sivil sr. De Jong lo ta den hunta di komisario di e kompania kompetidó di Insel ku ta Winair. Riba e punto aki minister Zita Jesus-Leito a reakshoná mesora i splika ku aña pasa de Jong a tuma retiro i bai for di Kòrsou. Ulanda a pidié pa e drenta e hunta di komisario di Winair i el a aseptá. Tempu ku tabata buska un direktor pa e departamentu Jesus-Leito a bai Ulanda i aya a sugerí e minister pa tuma de Jong. A duna de Jong un tempu di 9 luna pa atendé asuntunan na departamentu di aviashon di Kòrsou. E direktor a informá e minister ku e ta den komisariado di Winair. E momentu ei a palabra ku de Jong lo no atendé nada di Winair den departamentu di aviashon, lo laga na su suplente pa atendé eseinan i asina evitá konflikto di interes.

Pa loke ta trata e AOC, minister Jesus-Leito a deklará ku ta for di mei 2018 a duna chèns na Insel Air pa regla su asuntunan. Pues gobièrnu a duna chèns pa e kompania sigui hasi su trabounan, pero mester tene kuenta ku ta bin audit anto Kòrsou por hañ’e den mas problema i no por falta ku lei. Gobièrnu a duna Insel tur oportunidat pa kumpli ku lei. Ta dependé di e kompania pa logra, gobièrnu ta duna tur koperashon. Mas detaye den edishon di EXTRA.