WILLEMSTAD.-Un grupo di trahadó di Dr. Capriles Kliniek a disidí ku awor si ta basta i nan a tene un ‘walk out’ awe mainta. E Trahadónan tabatin diferente bòrchi riba kua nan a ekspresa nan malkontentu i asta preokupashon pa nan kondishon komo trahadó.

E Trahadónan a keda basta ratu pafó, ounke por a komprondé ku nan a sòru di ta responsabel i pèrkurá pa un grupo mínimo keda wak e pashèntnan. Trahadónan tabata bosifera lemanan buskando atenshon pa asina haña loke nan ta kere nan tin derecho riba dje ku ta entre otro oumentu di salario. Parse ku pa mas ku 10 aña Trahadónan no a haña niun adaptashon di salario miéntras ku kosto di bida si a subi tur aña. Trahadónan ta bon na altura ku Klínika Capriles a haña un bon suma serka minister di finansa i komo tal nan ta di opinion ku nan tambe por haña oumentu ku nan tin derecho riba dje. Nan ke mira pago pa trabou den wikènt i indexering.

Sindikato CBV a atvertí for di ayera ku e situashon aki lo por presentá, esta ku Trahadónan lo bandoná trabou den akshon. EXTRA ta pendiente ainda pa un reakshon di CBV. Mas detaye den edishon di EXTRA.