WILLEMSTAD.- Informashon ku EXTRA ta disponé di dje ta indiká ku trahadónan di e kontratista AGC a bira rebelde despues ku nan tin un bon ratu sin mira salario. Manera a keda splika e situashon di Refineria Isla i Girobank tin su efektonan riba e kompania.
Lider sindikal Alcides Cova di SGTK a konfirmá e preokupashon di e trahadónan. Cova a duna di konosé ku AGC semper ta un kompania ku ta kumpli ku su trahadónan. Den e situashon kaminda refineria tin basta tempu sin ta drai optimal e kompania a sigui kumpli. AGC ta kontratista ku ta enkargá ku trabounan di limpiesa riba tereno di Isla i COT.
Alcides Cova a bai awor aki serka e trahadónan di AGC pa despues purba buska solushon pa e situashon ku a surgi.