Nan kier a mira skema di pago

WILLEMSTAD.- Trahadónan di Kompania di Tou Kòrsou (KTK) a tene un akshon pa demostrá malkontentu i hala atenshon di gerensia di e kompania. Dirigente sindikal di UGTK-Cadmu Wendell Meulen den deklarashon na EXTRA a bisa ku ta for di siman e sindikato i Trahadónan tabata pendiente di un skema di pago di salario ku e kompania lo tene su mes na dje e aña aki. E trahadónan tabata spera un komunikado sali den kua gerensia ta duna e informashon aki i mirando ku awe djaluna mainta ainda nan no a hañ’e nan a demostrá nan malkontentu.

E komunikado ku informashon a sali, pero tabatin informashon riba dje ku e sindikato no tabata di akuerdo kuné. Pero despues di un ratu e problema a keda solushoná. Meulen a duna di konosé ku Bèrdat awe mainta e Trahadónan a sali pafó un ratu pendiente pa e komunikado sali i una bes ku e informashon a sali nan a bai nan trabou bek i tur kos ta trankil bèk na KTK.

Riba e pregunta kon e sindikato ta persibí e situashon na KTK, Meulen a bisa ku e situashon ta dependé di Isla. Ta asina ku nan a komprondé ku poko poko por mira un tiki mas moveshon na Isla loke ta un bon señal. Di otro banda tambe ta asina ku e sindikato tambe ta poniendo hopi preshon pa KTK haña trabou den eksterior. Pues riba tur frontera e sindikato ta poniendo preshon pa evitá ku mester yega na e punto kaminda e kompania mester bai den direkshon di retiro obligatorio.

Manera EXTRA a informá na algun okashon kaba, e kompania a tene buèlta di retiro boluntario i un kantidat di 16 hende a opta pa esaki. Ademas tin un grupo di 6 hende di kua nan kontrakt ta kaba pues ta un total di 22 hende ménos lo tin den e kompania ora ku nan bai ku retiro boluntario. E dirigente sindikal mesora ta enfatisá ku ta te ei por yega, no por sigui riba e rumbo ei. ‘Mester sigui wak trabou awor aki i wak futuro ku otro brel”. KTK tin 136 trahadó.