Update : Mara nos por haña NOW

WILLEMSTAD.- ‘Mara nos por haña NOW i asina por skapa pago di 20% tur luna na salario i asina nos por krea reserva pa e empresa aki.” Na palabra Joost Pronk di Uitdeuk en spuitinrichting Scherpenheuvel. E empresario a reakshoná riba deklarashonnan di su trahadónan indikando ku situashon di ekonomia na Kòrsou ta difísil promé ku Corona, i asta den periodo sumamente difísil aña pasá nan a sigui paga Trahadónan 100%. E kompania a apliká pa NOW pero nunka a haña esaki di gobièrnu i p’esei nan mester a sigui paga 100% ku tur konsekuensia ku esei ta trese kuné pa e kompania su eksistensia. Úniko luna ku nan a paga 60% tabata den e promé luna di lockdown total ku a dura 5 siman. Sobra lunanan nan a sigui paga Trahadónan 100% ounke pa 50% di tempu no tabatin trabou. E kompania tin sènnan di kobra di kompanianan di seguro pero eseinan tambe wanta ku pagonan. Si nan haña sènnan na seguro, awe mes lo paga Trahadónan e sobra parti di nan salario pasobra for di djabièrnè a paga 60%. No por a paga kompletu pasobra e sèn no tei. Ademas mas i mas kliente ta tuma sèn serka seguro i ta bai drecha nan outo ‘bou di palu’ i esei tambe tin su konsekuensianan. Pronk a ekspresa deseo di por haña NOW pa asina por traha un poko reserva bèk pa e kompania i asina garantisa su futuro. Si e situashon sigui den e kurso aki anto e kompania aki tambe lo sera meskos ku hopi otro na Kòrsou.

Pronk a puntra unda e 650 mion ku Ulanda a pone disponibel pa yudansa a bai pasobra sektor empresarial a haña apénas 29 mion. E empresario ta deseá di mira e kompania yega 100 aña, pero si no tin manera di hasi ta di sera e kompania, pero ku esei tur hende ta pèrdè mas sigur e trahadónan.

Trahadónan rabia a blòkia porta eksigiendo pago

Dunadó di trabou lo a manda trahadónan bai buska NOW

WILLEMSTAD.-Trahadónan di e garashi na Skèrpènè Uitdeuk en spuitinrichting Scherpenheuvel a bira furioso na momentu ku awe djaluna 31 di mei, esta fin di luna, nan Dunadó di trabou a manda e Trahadónan bai buska NOW. NOW ta para pa Noodmaatregel Overbrugging Werkgelegenheid i manera ta konosí esei ta e areglo ku empresarionan por apliká pa haña yudansa pa asina mantene Trahadónan na trabou den e tempu difísil di Corona. Den e kaso spesífiko aki e Trahadónan di e garashi ta desesperá pasobra otro fin di luna a yega i nan no por kumpli ku nan obligashonnan i pa komo e Dunadó di trabou ta manda bai buska e yudansa finansiero.

EXTRA a papia ku e Trahadónan ku a disidí ku nan ta blòkia portanan di e empresa. Trahadónan a disidí ku ta basta, nan no ta traha miéntras ku nan no haña nan pago. ‘Nos a yega fin di luna sin kobra. Nos a koperá ku doño di trabou, ta for di aña pasá momentu ku situashon di Covid a kuminsá nos ta koperá ku doño di trabou. Kada bia ku e pidi pa koperá pa tene e kompania na bida nos ta koperá. Nos ta mira ku e trabounan ta tuma lugá pasobra outonan ku drenta pa drecha tur ta kaba i nan ta bai sinembargo nos si no ta mira sèn. Tin hende ku hipotek i otronan ku fiansa personal, tur trahadó tin obligashonnan di kumpli kuné.”

E Trahadónan aki no sa na ken nan mester akudí pa yudansa, asina nan a bisa EXTRA un ratu pasá. Nan ta bon konsiente ku nan komo trahadó no por apliká pa e areglo di NOW i ku ta e Dunadó di trabou por hasi esei, pa e motibu ei nan ta rabia mas ora ku e Dunadó di trabou ta manda nan bai pidi NOW. Nan tin vários luna kaba ku nan no ta haña slep di salario. Keda pendiente EXTRA ta trese reakshon di e doño di e empresa.