WILLEMSTAD.- Awe mainta hopi tempran a drenta informashon ku tin trùknan di Selikor ku a Blòkia kaya na altura di Parera. E forma ku a pone e trùknan ta sigur ku niun vehíkulo no por pasa. E trahadónan a kanta akshon despues ku a reuní ayera mèrdia ku gerensia di Selikor. E sindikato a papi aki gerensia riba e situashon finansiero di e kompania. A splika e trahadónan kiko ta e situashon, den sentido ku gerensia a informá ku situashon di Selikor ta hopi delikado.

Manera ta konosí gobièrnu a kita 5% for di supsidio ku ta paga na Selikor. No a duna e sèn ei bek, i trahadónan a mira kaba ku aña pasa a kita basta trahadó ‘uitzendkracht’. Sindikato BTG ta na sitio i ta kordiná e akshon. BTG no ke tende ku niun trahadó ta pèrdè trabou. Nan ta indiká ku Selikor ta hasiendo sierto trabounan pa DOW, pero awor nan a haña informashon ku DOW ke tene destaho públiko loke niun momentu no tabata e intenshon. A base di esaki BTG ta premirá ku lo tin pèrdida di trabounan Selikor.

Akshon trahadónan DOK

Na Dòk tambe trahadónan a Blòkia e entrada di e astiero. Trahadónan ta splika ku nan tin hopi aña pendiente. Trahadónan ta bisa ku nan ta puntra pero no ta haña niun kontesta. A yama nan lider sindikal Angelo Meyer i awor ta pendiente pa e yega na e sitio pa asina splika trahadónan kiko ta pasando. E trahadónan a mustra di ta bastante determiná pa evitá ku niun trahadó ta pasa bai paden. Tantu trahadó lokal komo ekstranhero. E struktura di salario lo ta e punto pega di e kontrato kolektivo i trahadónan no ke warda mas pa haña kontesta.