Menasa di ‘no work no pay’ no ta stroba akshon

WILLEMSTAD.-Awe mainta e Trahadónan di fundashon ku ta duna servisio di kuido, Wit Gele Kruis a disidí ku ta pone trabou abou. Tur trahadó a sali ofisina i bai riba e plenchi di e edifisio na Sta.Maria. Nan a prepará un karta ku puntonan ku nan ke diskutí ku gerensia di e instituto.

Un eksigensia di e Trahadónan tabata ku aparte di e gerente mester tin tambe miembronan di e hunta di supervishon òf sikiera e vise presidente di e hunta di supervishon. Trahadónan a splika ku den pasado kada bia gerensia huntu ku e hunta di supervishon tabata hasi promesanan pero no ta kumpli. Nan sa ku ta e vise presidente di e hunta di supervishon ta asistí e aktual gerente, pues nan ta kere ku e lo por yuda den e kousa. Ya kaba e direktor a bai, e direktor di kuido no ta traha mas i meskos tin otro lidernan ku a tuma retiro.

Tin Trahadónan ku ta bai biba na otro isla òf pais pero tin Trahadónan ku ta kita for di WG i ta bai traha na otro instituto, anto esei ta nifiká algu. E Trahadónan ta desidido pa mira kambio.