E tabata den proseso di kambio dia a detené

 WILLEMSTAD.- Ayera abogado  mr. La Fleur a hasi petishon pa kobra daño perhuisio pa e eks detenido C. Martis ku a wòrdu deklará liber den korte di promé instansia. C. Martis ku ta den proseso pa bira “transgender” tabata será fo’i 13 di novèmber 2019 te ku 5 di yüni 2020. El a yega un  total di 206 dia será den aresto preventivo, promé ku su kaso a keda tratá. Dia 5 di yüni último hues a suspendé detenshon di e akusado, pendiente pa su kaso keda tratá.

Martis ta keda  akusá di a hinka  un hòmber dia 15 di sèptèmber aña pasá na altura di viadùkt.

Na novèmber 2019 polis a detené Martis, despues  ku e víktima a hasi denunsia.

Martis a insistí ku e no tabatin kuchú i no a hinka e víktima. El a bisa ku durante forsageo vários bòter di glas a kibra i e víktima a kai kòrta su kurpa.

Vários bia e kaso a keda posponé den korte, pa motibu ku e investigashon no tabata kla. Segun fiskal,  e akusado a deklará na polis ku tabatin yen menasa riba facebook kontra dje i a  mustra polis  tur kos.

Dia 23 di òktober último e  kaso mester a keda tratá, pero Ministerio Públiko a pidi pa deklará e akusado liber di kulpa, mirando ku no a hasi investigashon pa sa sigur ku e herida ku e víktima tabatin ta di kuchú òf di e glasnan ku a keda kibrá. Fiskal a bisa ku riba e video no por a mira e akusado ku kuchú den su man.

Esnan ku a deklará komo testigu, tambe a bisa ku nan no a mira Martis ku kuchú den man.

Mirando ku e investigashon no tabata muchu kla, no a keda Ministerio Públiko nada mas di deklará e akusado liber di tur kulpa.

Hues Edelenbos den su desishon a bai kompletamente di akuerdo ku fiskal.

Abogado La Fleur ayera a bisa ku si OM lo a intervení manera mester tabata den e kaso aki mas lihé i manera mester ta, anto e periodo di aresto preventivo di e akusado den e kaso aki lo tabata mas kòrtiku.

El a splika ku e konsekuensianan di e detenshon di Martis tabata teribel pe. Segun e abogado Martis tabata den proseso pa kombertí den un “transgender” ora el a keda detené. E proseso médiko no por a sigui su prosedura mas. A sera e akusado den departamento di hende hòmber. Durante su estadia den prizòn, el a keda agredí pa un detenido den su blòk.

E abogado a bisa ku komo si fuera esaki no tabata basta, a kita sierto guianan ku e mester a sigui pa yega na e  parti di su transformashon kual a pone ku e no por a sigui ku e proseso médiko.

Segun e abogado, detenshon di Martis a hasi hopi daño na su persona, reputashon  i ainda e ta sufri di e konsekuensianan ku e detenshon  a trese kuné pe.

E abogado a bisa ku e dañonan tabata tantu mentalmente komo físikamente. P’esei mirando tur esakinan e ta eksigí  daño perhuisio pa su kliente.