WILLEMSTAD.-  Awe djaweps 23 di sèptèmber, Aqualectra ta transportá un transformatòr grandi di su planta na Mundu Nobo pa su sup-stashon banda di Hoenderberg i Montaña Abou. E transformatòr di 30/12 kV ku tin un kapasidat max di 16 MVA lo remplasá e transformatòr aktual pa por optimalisá suministro di koriente pa Banda Riba.

Relashoná ku e trabounan ku mester tuma lugá lo transportá e transformatòr entre 8 or di mainta pa 12 or di mèrdia bou di guia di polis. E ruta ku lo usa pa transportá e makinaria pisá aki ta di Helmin Magno Wiels Boulevard, Weg naar Welgelegen, Frater Radulphusweg, Nijlweg, Schottegatweg West, Schottegatweg Noord, Snipweg, Schout bij nacht Doormanweg, Santa Rosaweg, Seru Loraweg, Caracasbaaiweg i Kaminda Jose C. Anthonia.  Aqualectra ta konsiente ku e transporte por kousa inkumbiniensia pa outomobilistanan i ta pidi komprenshon pa esaki. Remplaso di e transformatòr aktual na e supstashon den Banda Riba ta nesesario despues ku esaki a sufri un desperfekto durante di e anochi di djasabra 11 di sèptèmber 2021. Despues di a inspekshoná e ruta i e ekiponan lo hasi uso di dje i hasi tur preparashonnan i regla pèrmitnan nesesario den deliberashon ku Kuerpo Polisial i DOW ta kla pa transportá e transformatòr.