WILLEMSTAD.- Durante di e di dos mitar di siglo pasá, a tuma lugá un re-posishonamentu di papiamentu den komunidat di Kòrsou.

Eksponente prinsipal di e movementu akí tabata e poeta i eskritor Pierre Lauffer. Ku su obranan el a demostrá, ku riba tur nivel literario papiamentu ta kumpli ku tur eksigensia pa posibilitá ekspreshon, ampliashon di vokabulario i balor sentimental. Huntu ku esei e tabata un aktor prinsipal pa desaroyo di e lenga mes, salbando palabranan i ekspreshonnan ku tabata bayendo pèrdí i usando e idioma kreativamente.    

Herensia literario di Pierre Lauffer ta ankrá den un kantidat di dokumento, manuskrito, anotashon, artíkulo, revista i buki. Su famia serkano a warda nan kuidadosamente i Fundashon Pierre Lauffer a sigui manehá e archivo. Miembro di direktiva sra. Lucille Berry-Haseth, un di e fundadónan di Fundashon Pierre Lauffer a ordená i inventarisá e kolekshon na un manera ábil.

Pa sigurá konservashon di e archivo akí pa futuro investigadónan, resientemente e fundashon a traspasá e kolekshon pa Biblioteka Mongui Maduro na Rooi Catootje. E akto di traspaso a keda efektuá pa presidente di Fundashon Pierre Lauffer, sra. Esther van Haaren-Hart (alabes anterior manager di e biblioteka) na direktor aktual di e biblioteka, sra. Monique Alberts. Di e manera akí e kolekshon ta keda konservá i aksesibel pa futuro generashonnan.

...E akto di traspaso di sra. Esther van Haaren-Hart, presidente di Fundashon Pierre Lauffer na sra. Monique Alberts, direktor di Biblioteka Mongui Maduro...