Tin un grupo den nos komunidat ku ta hasi un trabou masha balioso na interes di esnan ku no por yuda nan mes òf mester di un tiki mas yudansa. Ta trata di e grupo di Mantelzorg. I nos a papia ku Solange Sparen di Mantelzorg “Nos ta hasié huntu”. Mantelzorg ta kuido i sosten ku famianan ta duna na otro, persona ku konosé i amigunan.

Kuida un ser kerí...

 Mantelzorg ta e persona ku ta kuida un ser kerí i e persona aki tin laso familiar ku e persona ku e ta kuida, por ta famia, mama, mayornan, yu. Mantelzorg no ta ora ta kuida hende bon di salú. Tin bia tin hende ku ta traha den kuido, ta lubidá hende di dje siendo su profeshon ta enfermero tambe. E hende ku ta kuida otro profeshonalmente no ta Mantelzorg. Ta solamente si tin famia ku tin di bai kuida por papia di zorgverlener i mantelzorg.

Promé trabou...

 Solange tin 39 aña ta traha den kuido. Ku 20 aña el a kaba su estudio i promé trabou tabata sosten pa un mantelzorg aki na Kòrsou mes. El a haña su trabou den 2 luna di tempu. El a kuminsá kuida famia di un mener ku a haña un ataka i e mener ei mester a bai dependé di su pareha, ku mester a kuid’é. E pareha na su turno tabatin mester profeshonalnan pa yud’é. Solange tabata traha mainta i un otro kolega atardi. E eskoho tabata bon pasobra e mener mester a bai fisio, e no tabata papia mas i hopi kos nan komo mantelzorg a yuda kuné.

Konosementu di kuido...

No nesesariamente un persona tin di traha den kuido pa e por hasi e trabou di Mantelzorg. Hopi bia segun Solange, e personanan mes ta skohe pa esei. Kuido ta den bo mes man, ta bo ta disidí kua direkshon bo ta kue. Sea pone e hende na kas di kuido òf kuid’é na kas mes i ora hasié na kas tin bia no tin e konosementu di hopi kos. Pero tin e sosten di Wit Gele Kruis pa e partinan di kuido personal manera bañamentu, kambia pamper ets. I si ta hende ábil, e ta wak i siña pero hopi bia e ta keda algu duru pasobra tin hende no ta pidi yudansa i ke hasié nan so. E por trese komo konsekuensia ku e hende mes tambe despues ta bira malu. I p’esei ta nesesario pa e hende tin poko konosementu di kiko e ta hasi prinsipalmente di kuido personal òf kon atendé ku heridanan. Tin hopi aspekto di kuido ku ta bin dilanti i mester di konosementu pa esei pa hisa e kalidat di kuido na kas.

E diferensia...

 Solange a bai Hulanda i einan a wak e diferensia. Na Hulanda tin hopi fasilidat i na Kòrsou e ta tiki i e ta hasi ku hopi bia no tin hopi rekurso pa hende hasi diferente kos. I p’esei el a yega na e idea pa tòg duna atenshon i rekonosementu na Mantelzorgernan na Kòrsou.

Na Kòrsou...

Solange a biba 22 aña na Hulanda i einan tambe e tabata den e Mantelzorg. Awor aki e tin 14 aña bèk na Kòrsou i 10 aña ta traha den kas di kuido. Dor di e añanan e ta mira e nesesidat prinsipalmente pa mantelzorg. I trahando den kas di kuido, e guia i training ta importante pa motivá e trahadó di kuido mas ainda.  Mantelzorg ta parti di di kuido, no ta hospital nobo so, kas di hende grandi so ta konta, pero mantelzorg tambe ta hasi kuido.

Situashon difísil...

Tirando un bista riba su trabou, Solange ta konta kiko e ta eksperensia. El a bisa ku tin hende ta kere ku ora un otro hende haña demensia, e no ta kòrda nada mas. Tin un mama por lubidá asta ku ta su yu i tin hende no por ‘verwerk’ e kos ei. I esei ta e parti di aseptashon ku hende tin problema kuné. No solamente e parti di pèrdè memoria pero tambe ora e malesa mes presentá. Sa tin kaso di aksidente kaminda muchanan yòn ta enbolbí i nan no ta bira e persona ku nan tabata. Esei tambe mester dil kuné. Nan ku ta kuida, e profeshonalnan ta haña nan ku e situashonnan ei. Solange ta kòrda un kaso di un mucha hòmber di 20 aña ku ora a trese el a toke pasobra e por ta su yu. Pero komo profeshonal bo mester para firme. Pero apesar di esei mester trata ku amor. Un kuidadó ta keda e di dos famia. Prinsipalmente esun ku ta hasié di kurason. Den su kaso e ta traha diferente warda i ta den diferente situashon, e por drumi for di kas i pasa parti di su bida ku e hende ku ta kuida.

Di nos...

 Mantelzorg ta algu di nos. E ta serka di nos. E por ta bo mama, e mantelzorg por kuida su mama, su yu, tata i asta e bisiña ku ta su so. E mantelzorg ta bira manera su famia. E ta algu hopi importante. Tin hopi hende ta hasié na Kòrsou pero por ripara ku no tin sufisiente guia. Tin bia nan ke papia di un hende di kiko e ser mantelzorg ta trese kuné. E hende por hañ’é den soledat. E personanan aki mester trese nan den komunidat. Nan bida sosial ta kambia i mester tin algu pa nan. Un dia di kuido pa nan mes.

E fundashon...

 Solange ku ta den Mantelzorg a bisa ku den nan plannan lo tin charla i enkuentronan sosial. Asta ku COVID awor aki mester adaptá e aktividatnan pa tòg por organisá algu ameno pa e mantelzorg tin algu pa su mes. Pa loke ta e proyekto di Mantelzorg ku tin 5 aña di eksistensia i ku a bira awor un fundashon “Nos ta hasié huntu”. Solange a kana su kaminda largu, el a papia ku diferente entidat pa a yega na e fundashon. E promé entidat ku el a aserka ta SVB. Einan el a a komprondé ku ántes mantelzorg tabata haña un gratifikashon pero a sake afó. 2 aña Solange a komprondé ku na Hulanda a bin ku lei pa mantelzorgnan ku ta traha i ta kuida un ser kerí pa haña un gratifikashon. I Solange ta pensa ku esei por bin na Kòrsou tambe. Tin hende di ménos rekurso tambe ku ta kuida otro hende na kas, tin hende di edat haltu ku ke ta den nan mes ambiente. Ora bo ta kuida hende na kas bo tin di adaptá bo ambiente di biba. Ta algu amplio ku tiki tiki ta traha ariba. I asta FKP tin un ròl den dje pasobra tin hende den kas di fundashon i nan kas mester keda adaptá.

Balorá bo mes...

 No tin niun di e tipo di fundashonnan aki na Kòrsou. I den e statuto tin ku e lo drei ku donashonnan pa asina por hasi kosnan pa komunidat. Solange ta deseá un kas pa Mantelzorg ku su patio i pa ora tin enkuentro nan por sinti nan na kas. E mantelzorg mester siña tin balor di su mes i kuida su mes pa asina e por kuida otro. e ke pa e pashèntnan ta kómodo. El a traha den hotèl pa hende grandi. Mantelzorg ta un esfuerso i ora no por no por. Pero hopi bia e persona ta laga su mes asuntunan na kas pa e bai yuda un otro. Mantelzorg ta algu di kurason. Ta importante pa Mantelzorgnan rekonosé nan mes i kuminsá Sali un tiki partisipá den e proyekto di e fundashon aki. p’esei mas informashon, mas importante pa e Mantelzorgnan. Por tuma kontakto 59996916421 (Mantelzorglijn, solamente pa yama). Tambe por e-mail ta  mantelzorg.nthh@hotmail.com. I tin e Facebook ku ta ‘mantelzorg Nos ta hasié huntu’.