WILLEMSTAD.- Por bisa ku e kantidat di loke ta yama “medische uitzendingen”, pues pashèntnan ku ta ser manda den eksterior pa tratamentu a baha drástikamente den 2020. Esei di akuerdo ku e relato anual di Banko di Seguro Sosial (SVB). Den su relato SVB ta bisa ku e departamento ku ta atendé ku tratamentunan den eksterior por hasi esaki di akuerdo stipulashonnan den e Lei di Seguro Básiko.

T’asina ku tratamentu di eksterior por ser hasí riba petishon di un spesialista médiko, den kaso ku e tratamentu no por ser hasí na Kòrsou mes i ku esaki ta nifiká un adelanto den salú di esun envolví.

Den aña 2020 e kantidat di tratamentunan den eksterior a baha konsiderablemente, i por atribuí esaki entre otro dor di e pandemia di COVID-19. Si na luna di yanüari 2019 tabatin 100 kaso, esaki a baha te na 60 den 2020. I asina den tur luna esaki a baha sin eksepshon:

2019    2020

Yanüari         100      60

Febrüari        99        53

Mart             100      32

Aprel            77        4

Mei               97       4

Yüni             104      15

Yüli              112      34

Ougùstùs       83      18

Sèptèmber     85      29

Òktober         92      46

Novèmber     107     23

Desèmber      50      14

Di akuerdo ku SVB, den 2019 tabatin un total di 1.103 ‘uitzending’ di kual 85, ku ta 8%, kaso agudo. Den aña 2020 e total di ‘uitzending’ a baha na 332, di kual 41, ku ta 12%, kaso agudo pa eksterior.

Labor i Salú

E departamento di Labor i Salú teniendo kuenta ku su ekspertisio tin un tarea importante den e parti di guia di apsentismo i evaluashon di inaptitut pa trabou (arbeids ongeschiktheid) bou di trahadónan, konforme e lei di Seguro di Malesa i e lei di Seguro di Aksidente.

Den 2020 pa motibu dje pandemia mester a hasi mester a hasi kambio riba hopi aspekto den e prosedura di kontròl riba inaptitut pa trabou pa asina esaki por a kontinuá di e manera mas efektivo i efisiente. A bai over riba meldumentu di inaptitut pa trabou via ‘online’, kontakto telefóniko pa konsulta banda di e kontaktonan físiko, miéntras ku e registro obligatorio di inaptitut den trabou di dòkter di kas a laga kai.