WILLEMSTAD.- Un porsentahe relativamente haltu di klientenan ta satisfecho ku e servisionan di Kranshi i tambe di Lokèt di Pèrmit. Minister Armin Konket ta kere ku mester duna prioridat na introdukshon di "E-Government" di forma integral. Segun e mandatario den deklarashon pa EXTRA, ta trata aki di uso di teknologia di informashon i komunikashon pa ku servisio na públiko i ta algu ku pa definishon ta rekerí invershon. E ekspanshon aki no a bai ku e pasonan grandi manera deseá, pero ku pasonan chikí konforme e espasio finansiero limitá. Ta trata di entre otro e siguiente pasonan:

Sigui desaroyá lokèt di Pèrmit komo ‘e bentana úniko’ na kua e siudadano ta akudí na lugá di kana di un departamento pa otro.

Trahamentu di sita ‘online’

Akseso di siudadano na informashon pa medio di wèpsait/lokèt digital a bira mihó; Informashon riba 50 produkto ‘online’. Trainingnan a keda duná na empleadonan pa asina por hisa e kalidat di servisio.

Mas aleu segun sr. Konket, a revisá tur e diferente prosesonan i hasi adaptashonnan pa yega na un servisio mas mihó i rápido. Revishon di prosesonan ta programá pa tuma lugá den kuadro di reforma di e aparato públiko. E proseso aki, debí na limitashonnan finansiero, no a drenta fase di ehekushon. Loke si a logra hasi ta di lantamentu di un Plataforma di Konosementu pa duna Servisio. E plataforma aki ta brinda kolaboradornan enkargá ku formulashon i ehekushon di maneho riba e tópiko e posibilidat pa ta den kontakto ku otro i asina siña di otro su eksperensia.

Pa loke ta trata e servisionan di Kranshi i Lokèt di Pèrmit, e dos instansianan riba base frekuente ta midi e grado di satisfakshon di públiko pa ku e servisio risibí. Resultado promedio ta e siguiente:

Segun Konket, un 84% di klientenan ta satisfecho ku servisio di Kranshi, miéntras ku 90% ta satisfecho ku servisio di Lokèt di Pèrmit.

Finalmente e mandatario a splika ku durante e periodo di gobernashon aki a entamá e trayekto di VVU, pues kreando e posibilidat pa ámtenarnan por opta pa baha ku penshun adelantá. Den e kuadro aki por hasi menshon tambe di e trayekto di VVU ku meta pa subi produktividat den aparato públiko. 600 ámtenar ku interes pa VVU. Ehekushon di e trayekto aki ta krea espasio pa kambio di funshon i tambe krea espasio pa 200 profeshonal hóben. E trayekto di VVU lo keda implementá durante e próksimo periodo di gobernashon.