WILLEMSTAD.- Pueblo di Kòrsou un biaha mas a duna sosten na e tremendo proyekto di Kaya Kaya. Un multitut di hende a asistí na e evento ku e biaha aki a konsentrá su mes den e parti pabou di seru di Otrobanda.

E organisashon por mira atras riba otro eksitoso evento kaminda a bolbe logra e meta pa sigui duna sosten pa desaroyá e área di Otrobanda. Diferente mural a keda pintá sin konta kasnan ku a keda usá pa pintornan lokal por a eksponé nan pinturanan.

Artesanonan lokal a haña e oportunidat tambe pa ekshibí i bende nan arte.

Muzik no a hasi falta, nos bandanan lokal, agrupashonnan rítmiko, gruponan di jazz, dj i kaha di òrgel a duna henter e aktividat un ambiente festivo kaminda públiko por a baila i gosa durante henter atardi bai kue anochi.

Riba e potrètnan nos por apresiá algun momentu durante dje edishon di Kaya Kaya 2024.