WILLEMSTAD.- Fundashon Kuido di Ambulans Kòrsou a tuma ayera e tres ambulansnan nobo den funshon ta trata di tres ambulans diferente di loke nos konosé na Kòrsou pero ku ta bon usá na Merka.

Durante di e seremonia ku a tuma lugá riba tereno di FKA na GGD Zakitó tabata presente tambe minister enkargá ku salubridat Sra. Suzy Camelia-Römer kende a mustra kon kontentu e tambe ta ku e atkisishon nobo aki.

Ku e ambulansnan nobo FKA ta renobá i amplia su flota dunando servisio diariamente for di e 3 pòstnan, esta Pòst Barber, Pòst Montaña i Pòst Zakitó.

Yamadanan ku drenta riba 912 ta keda atendé dor di un sentralista kende konforme protokòl, ta hasi seri di pregunta pa haña datonan importante, pa por determiná e grado di e situashon. A base di e datonan aki e sentralista ta saka un òf mas ambulans pa duna asistensia.

E situashon por ta sea un òf mas víktima di un aksidente, trasladá un pashènt di dòkter di kas pa hòspital òf un aksidente na kas, riba kaminda òf kualkier otro lugá riba nos isla.

E aparatonan médiko ta idéntiko den tur ambulans. Tantu e sistema di komunikashon pa medio di radio i esun di ‘tracking’, esta GPS, ta idéntiko na esnan den e ambulans anterior. E 3 ambulansnan nobo ta ekipá ku un brankar hidróuliko. Esaki ta nifiká e brankar so por subi i baha. Manera e personal mes a bisa ayera durante di e seremonia, na Kòrsou nos konosé hendenan di peso i esaki tabata kabando ku nan lomba. Awor ku e brankar aki nan por traha, atendé salú di otro i kuida di nan mes.

E personal di FKA ta kontentu ku, i orguyoso di, e ekspanshon kualitativo aki, ku ta nifiká un sosten balioso pa ku nan trabou di kada dia.

Ku e akto aki Kuido di Ambulans ta dal otro paso signifikativo den mehorashon di e kalidat di servisio na Kòrsou.