WILLEMSTAD.- Pa restorantnan di Kòrsou, e tres blackout nan di e siman tras di lomba ta nifiká mas sla pa nan. Asosashon di restorantnan, CRA, a duna diferente relato den lunanan tras di lomba pa mustra den kiko restorantnan na Kòrsou ta pasando aden.

Awor ku 3 blackout den un siman, nan ta pone tur kos ku a sosedé te ku aworakí riba un rei:

Na mart tur negoshi a haña nan mes ta sera nan portanan pa un luna i mei. Lockdown a drenta na vigor. A introdusí NOW pa luna di aprel, ku no a resultá bon pa hopi negoshi. A anunsiá ku no mester paga OB i no mester paga e parti di AOV/AWW di dunadó di trabou.

Luna di mei ta haña plachi di dia i restorantnan por kuminsá ku ‘delivery’ i ‘take out’, kual pa mayoria no tabata un éksito. Toke de keda a keda implementá.

Na yüni esnan ku tin terasa por habri te ku un máksimo di 25 hende den e restorant. Toke de keda a wòrdu ekstendé un tiki. Algun restorant a kuminsá nota ku nan no por sobreviví i a disidí di sera nan porta.

Na yüli a habri frontera. turistanan por bini Kòrsou. Esaki a tuma mas ku 3 siman ku por a ripará ku turista a kuminsá bini. Restorantnan “paden” por risibí un máksimo di 25 persona.

Na ougùstùs a ekstendé toke de keda  te ku 12 or di anochi pa 5 or di mainta.

Restorantnan, bou di preshon di CRA, a haña ekstenshon pa bai 50 persona máksimo, òf 50% di bo kapasidat te un máksimo di 50 persona. Turistanan ta kuminsá bini for di Oropa i hotèlnan ta kuminsá haña algun kamber. A konstatá Promé kaso di COVID-19. Orígen no ta konosí.

Sèptèmber kasonan ta kuminsá bira mas. Ta reintrodusí Toke de keda pa 11 or di anochi.

Oktober restorantnan ta kuminsá sinti e efekto di e turistanan i ta kuminsá drai mihó. Algun di nan no mester a apliká pa NOW.

Novèmber e kasonan di COVID-19 ta krese i ta introdusí Toke de keda di 9 or di anochi. Restorantnan tin ku sera 8 or.

Belasting ta kuminsá manda “aanslag” di pago pa OB i primanan di aprel, mei ku yüni.

Kasonan ta subi lihé i a introdusí lei seku den desèmber. Esaki ta pa solamente negoshinan di Horeca. Supermerkadonan por sigui bende alkohòl, mientrastantu “fiestanan di kas” ta oumentá.

Hulanda ta marka nos ku kódigo oraño, kanselashon ta drenta mesora pa paketenan di hotèl i restorantnan tambe ta haña nan konfrontá ku kanselashon. Aerolíneanan ta desviá nan buelonan pa Aruba i Boneiru. Mas restorantnan a sera nan porta, algun temporal i algun pa semper. E medidanan lo por krea e efekto di dominó, esta algun mas lo sigui.

Blackout total na Kòrsou, dia 7 di desèmber. Diferente negoshi no por a habri nan portanan. Despues di algun dia, e siguiente blackout, 3 dia despues di e promé un, esta djaweps 10 di desèmber. Negoshinan ta keda será atrobe. Pa kolmo, djasabra 12 di desèmber, nos ta keda konfrontá ku otro blackout. Negoshinan a sera mas tempran, i pa kolmo e blackout aki tin un rèkòrt, pa sierto áreanan mas ku 17 ora largu. Diferente restorantnan lo tin ku deshasí di nan stòk, kual lo a daña, esta otro sla. Awor mas ku nunka e TVL (Toeslag Vaste Lasten) ku minister a menshoná, mester bin urgente i na Desèmber aki mes!

Desèmber ta e luna mas mihó pa tur restorant, kaminda ta haña oportunidat di traha riba bo reserva pa e siguiente lunanan. E aña aki, esaki ta e luna ku ta marka ku benta di mas abou, ku eksepshon di aprel kaminda tur negoshi tabata será.

Tin ku menshoná, ku sifranan a proba ku te ku dia 6 di novèmber, transmishon di e vírus den HORECA tabata solamente 1%. Por dedusí di esaki ku restorantnan ta e lugá mas seif ku por bai!

Nos falta algun siman. Pasku ta dilanti porta, i nos ta spera ku e restorantnan lo por haña un alivio pa e sobrá dianan ku a sobra. Dispensashon di lei seku, i toke de keda te ku 11 or lo ta un yudansa. Dia 14 di desèmber lo evaluá i nos ta spera ku ta tuma esaki na konsiderashon.

‘Nos hendenan lokal nos ta pidi pa sostené bo restorant faborito. Bai kome einan òf kumpra un giftcard ku por usa pa regalá pa Pasku. Tur yudansa awor ta bon biní. Sigur si bo no ke pèrdè bo lugá preferí!