WILLEMSTAD.- Kòrsou a konosé otro kaso di asesinato lamentabel kaminda un hóben di apénas 18 aña di edat a pèrdè su bida.

Djasabra último den oranan di anochi, Sentral di Polis a risibí yamada di un kaso di tiramentu ku a tuma lugá den Kaya Berom na Montaña Abou i den kua tin un persona heridá. Diferente unidat polisial ku a yega na e sitio a  topa un hòmber drumi abou ku herida di bala na e parti ariba di su kurpa i no tabata duna señaldi bida. Na yegada di ambulans ya no por a hasi nada mas pa e víktima. Dòkter di polis a konstatá morto di e hòmber Trevor Welvaart, nase na Kòrsou dia 18 di òktober 2002.

For di investigashon preliminar a sali na kla ku e víktima tabata serka algun persona den e kaya ei, na momentu ku un òf mas persona nan a pasa i lòs tirunan dirigí, ku a alkans’é na e parti ariba di su kurpa.

Riba òrdu di fiskal di Ministerio Públiko a konfiská e kurpa. Investigashon den e kaso aki ta kontinuá.

Ku e asesinato aki, Kòrsou a konosé e di 4 kaso pa aña 2021, den e promé 7 lunanan di aña. Na luna di mart Kòrsou a konosé e promé dos kasonan di asesinato di kual e promé na Juan Hato ku tabata a konsekuensia di tiramentu i e di dos na Parera tambe tiramentu. Ámbos hende hòmber di 38 i 21 aña di edat. 3 luna despues riba promé di yüni Kòrsou a konosé e di tres kaso di asesinato, konsiderá unu basta kruel. A haña un hòmber benta den mondi tras di stadion di Suffisant. A resultá ku e sospechoso (nan) a dal e hòmber víktima ku vehíkulo i tambe a los tiru riba e víktima ku konsekuensia fatal. Remarkabel den e kaso di asesinato na Suffisant ta ku e dos sospechosonan ta hende muhé, tanta i subrina.

Konsekuentemente, un total di 4 kaso di asesinato den promé 7 luna di 2021 i tur víktimanan bou di 40 aña.

LAGA UN KOMENTARIO

Please enter your comment!
Please enter your name here