WILLEMSTAD.- Ayera mèrdia wardakosta huntu ku polis a logra detenshon di tres tipo relashoná ku un boto sospechoso ku a yega for di Venezuela den oranan di mardugá.

For di mardugá outoridatnan tabata sigui moveshon di e tiponan aki mirando ku tabatin sospecho ku nan tabata hasiendo moveshonnan no usual. Aparentemente nan lo mester a yega Kòrsou ku algun persona indokumenta tambe.

Polisnan a sigui tur moveshon i a warda na momentu ku e tres tiponan aki a bai bek na e boto pa asina a detené tur tres. A konfiská e boto i tambe un vehíkulo ku nan tabata move aden pendiente mas investigashon.

Bosero di Wardakosta Shalick Clements a indiká na Extra ku den transkurso di dia awe lo por bai den mas detaye relashoná ku e kaso aki.