WILLEMSTAD.- Korte a disidí ku e trio di polis formá pa Hayshenicke H., Shairo S., Yu-Maiklin B. Ta liber di tur akusashon. Na mes momentu nan lo no keda persiguí mas pa hustisia. Ministerio Públiko a pidi 240 ora di trabou boluntario pa e polisnan envolví den e kaso di persekushon i tiramentu riba outo ku a kosta bida di un atrakadó. A trata aki di un kaso di atrako armá dia 27 di sèptèmber 2021. Den e kaso ei un trio atrakadó a kometé e krímen riba un minimarket chines riba Dr. Maalweg, pero despues polis a topa ku nan riba kaminda. Despues di persekushon i intento di huida, polisnan a haña nan mes obligá di lòs tirunan dirigí riba e outo i aki Z. Nicasia di 18 aña a pèrdè su bida. Tres di e agentenan polisial ku a tira a ser akusá di asesinato.

E trio di polis formá pa Hayshenicke H., Shairo S., Yu-Maiklin B. no a haña ku nan a aktua robes den un kaso di persekushon ku a bin resultá den morto di un atrakadó. Nan a mustra ku nan a aktua di akuerdo ku nan trabou i ku desafortunadamente e hóben di 18 aña a bin pèrdè su bida. Segun un dje agentenan polisial, niun polis no ta sali su kas bai traha ku intenshon di mata hende.