WILLEMSTAD.- Ayera TUI a disidí pa para tur buelo di fakansi ku ta bai islanan di eks-Antia Hulandes i tambe Islanan Canaria. E desishon aki a kai den tòp di TUI despues ku gerensia di TUI a tene un reunion basta largu. A skrap tur buelo di vakashon for di ayera te ku mitar di luna di mart.
E Islanan Canaria i paisnan di eks-Antia a kambia di kódigo hel na oraño p’asina nan por tin kontròl riba plamamentu di e vírus di Corona den e islanan.
Bosero di TUI a indiká ku dor di konseho negativo di gabinete Rutte pa biaha, e kompania a tuma e desishon di para buelonan di fakansi pa islanan di Antia i Canaria.
Esaki ta nifiká ku TUI solamente ta realisá buelonan di regreso pa Hulanda. For di Kòrsou, Aruba i Bonaire, TUI ta pone buelonan èkstra pa buska turistanan for di e islanan aki.
Hustamente ayera, un siman promé, dia 9 di desèmber, ministerio di asuntunan di eksterior di Hulanda a pone Kòrsou riba kódigo oraño debí na oumento di Coronavirus riba nos isla. E momentu ei TUI a anunsiá di ta stòp ku benta di paketenan di vakashon pa Kòrsou. TUI ta aserká tur klientenan ku a hasi reservashon pa Kòrsou, ku nan tin komo alternativa Aruba, Bonaire òf Islanan Canario pa bishitá. Pero awor a sera porta pa islanan ABC i tambe islanan Canaria.
Loke a hala atenshon ayera na Hulanda ta ku Schiphol pa di dos dia siguí, despues ku promé minister Rutte a anunsiá “lockdown”, tabata drùk ku hendenan ku tòg ta bai di vakashon. Rutte den su medidanan di “lockdown” a konsehá pa no biaha, biaha solamente si ta nesesario. na e terminalnan di avionnan ku ta direkshon pa Kòrsou tabata bastante drùk i esaki a lanta pregunta serka miembronan di Tweede Kamer.