WILLEMSTAD.-  Kòrsou ya ta disponé di 14 stashon di karga pa transporte públiko i awor a toka turno na Boneiru pa nan promé stashon. A instalá un stashon di karga TUI pa transporte eléktriko na e tienda di TUI riba tereno di Chogogo Dive & Beach Resort. E stashon a keda poné ofisialmente den uso dia 26 di sèptèmber den presensia di Hans i Gertrude Schellevis (Chogogo Dive & Beach Resort Bonaire), Urni Rosalia (Dynaf) i Antoin Klein Hofmeijer (Head of TUI Dutch Caribbean). Ta e promé di un total di 10 stashon di karga ku e organisashon di biahe ta instalando na Boneiru huntu ku Dynaf. E promé stashon aki ta e siguiente paso den e proyekto ku TUI a kuminsá na fin di 2022, den kual lo instalá un ret di stashon di karga riba islanan ABC. Aruba, Bonaire i Kòrsou ta destinashonnan importante pa TUI. Anualmente, hopi t’e bishitante ku ta disfrutá di nan fakansi riba e islanan. E organisashon di biahe ta kere ku ta importante pa futuro generashon por sigui disfrutá di e islanan. Ta p’esei, TUI ta invertí den inisiativanan lokal ku ta sostené durabilidat. Huntu ku Dynaf lo instalá un ret di 55 stashon di karga riba islanan ABC entre nan, 15 na Aruba, 10 na Boneiru i 30 na Kòrsou. Di e manera aki ta enkurashá stürmentu di outo eléktriko i aselerá e transishon pa transporte sostenibel. Antion Klein Hofmeijer, Hefe di TUI Dutch Caribbean: “TUI tin un laso fuerte ku Boneiru i nos ambishonnan di sostenibilidat ta bai man den man ku esnan di e isla. Mi ta kontentu ku nos a kuminsá awor akinan tambe ku nos proyekto di stashon di karga i di e manera aki nos por kontribuí na un futuro mihó i mas bèrdè pa Boneiru.” Na Kòrsou tin 14 stashon di karga, nan ta: Ofisina di TUI na Zeelandia (2x), Chogogo Resort Curaçao, Jan Thiel Beach, Papagayo Plaza, Avila Beach Hotel, Lions Dive Beach Resort, Restaurant Bali, Grote Berg, Restorant Pasawá, Parke Christoffel, Mahaai: Nuthouse , Kura Hulanda Village, Coral Estate – restorant Karakter i Bahia Apartments.