WILLEMSTAD.- Segun e organisashon ‘Consumenten Belangen Curaçao’ gobièrnu di Kòrsou no ta hasi sufisiente kontra doñonan di trabou ku ta obligá personal pa vakuná. Asina e organisashon ta duna di konosé. Maria van Os di Consumenten Belangen Curaçao djaluna último a manda un komunikado di prensa. E organisashon ta di opinion ku gobièrnu tin ku aktuá mas severo kontra doñonan di trabou ku ta obligá vakunashon.
Manera ta konosí algun siman pasá tabatin konsternashon den medio di komunikashon i bou di un grupo di trahadónan dor di e notisia ku Centrum Supermarket a obligá tur su trahadónan pa vakuná. Relashoná ku esaki Van Os a duna un entrevista na radio. Den e entrevista el a bisa ku vakunashon obligatorio no ta permití. Pa kolmo doñonan di trabou no tin e derechi pa puntrta trahadónan si nan ta vakuná si òf no. Segun Van Os gobièrnu ta na altura di esaki, pero te ainda nan no ta aktuá sufisiente kontra doñonan di trabou ku ta violá e reglanan. Segun Van Os resientemente a bira konosí ku The Gym na Lions Dive Hotel ta obligá nan trahadónan pa vakuná i banda di esei ta ninga kliente ku no tin prueba di vakunashon òf ku no por mustra resultado di un tèst di PCR.
E organisashon ku yama Consumenten Belangen Curaçao resientemente a manda diferente karta na e ministerio di Desaroyo Sosial, Labor i Bienestar tokante esaki. Segun e ministerio kompanianan no por obligá vakunashon kontra Corona. Pero na mesun momento ministerio di SOAW a duna di konosí ku nan ta aktuá solamente si un doño di trabou retirá trahadónan ora nan ta ninga di wòrdu vakuná. Segun Maria van Os esaki no ta sufisiente. Van Os ta pidi gobièrnu pa manda un señal hopi kla ku obligashon no ta wòrdu tolerá. E organisashon ta pidi gobièrnu pa instalá un punto di notifikashon telefóniko. Pa trahadónan por mèldu anónimo si nan doño di trabou ke obligá nan pa vakuná. Tambe gobièrnu tin ku instalá sanshonnan kontra e kompanianan konserní, Van Os ta bisa.