WILLEMSTAD.- Kòrsou ta pasando atraves di un periodo di áwaseru, i esei tin konsekuensianan positivo pero tambe esnan ménos positivo, dependé kon bo ta mir’é. Si nos aserká esaki for di e punto di bista positivo, e ta algu ku ta yuda oumentá e nivel di awa den nos sup-suela; e ta un super bon notisia pa kunukeronan ku ta planta; e ta baha kalor i ta bon notisia tambe pa nos flora i founa. Di otro banda, hopi áwaseru por ta kousa di inundashon, roinan ku ta desbordá, daknan ku ta kuminsá lèk, pero tambe ekseso i plaga di animal i insektonan no deseá. Loke komunidat por spera ku tantu yobida ta e molèster di sangura. Kasi esei ta algu konsiderá komo outomátiko i normal. Pero EXTRA e komprondé ku e último dianan aki tambe tin hopi keho di sapu. E presensia di sapunan straño ta di tal forma ku por papia aki di un plaga di sapu. For di tur skina di Kòrsou tin keho i reklamo ta drenta di habitantenan ku tin molèster di e ambifio aki. Nos kolega Stanley Ignacio ta ser bombardiá tur e dianan aki ke keho di sapunan ku ta trata di invadí kasnan di hende. Remarkabel ta ku hopi dje bestianan aki ta sali for di arianan ku tin awa ketu pará manera e.o. dam. Barionan ku ta keda den arianan manera Muizenberg, Kwartier, Cas Grandi ta ser konfrontá ku e problema aki ya ku ta eksistí dam òf arianan unda tin plasnan grandi di awa pará. Un situashon manera esei ku presensia di awa dushi ta ideal pa e sapu en partikular pa e brui. E espesie aki su webunan por keda wardá pa hopi tempu sperando e sirkunstansianan apropiá pa desaroyá nan mes i kombertí den sapu. EXTRA ta kere ku no mester warda riba Ministerio di Salubridat (GMN) pa bolbe atvertí dje peliger i molèsternan ku por surgi. Entre otro sòru pa eliminá tur artefakto ku ta fangu awa manera e.o. bleki, tayer bieu, barí, skòternan bou di baki di mata, limpia hetnan di dak i tira Abate den rembak pa evitá multiplikashon di sangura. Den kaso di sapu, simplemente mester eliminá tur kos ku por kontené awa, pasobra si nan ta riba bo tereno kaba, nan por multipliká den awa dushi. Si tin sapu ta bula rònt kaba, por sprengu salu riba nan i nan lo disparsé. Aparentemente e sapu chikí koló krèm/maron ku tin aktualmente ta unu oriundo di Cuba ku a yega aki. Pero ta dje forma ei por kore kuné òf laga pushinan yag riba nan.