WILLEMSTAD.- Awe tin un eklipse solar ku por keda mirá den su totalidat den e region di Nòrt Amérika. Un eklipse ta na momentu ku mundu, luna i solo ta aliniá ku otro i e luna ta tapa visibilidat di e solo pa un korto tempu. Na Kòrsou i den área di Karibe e eklipse lo ta unu parsial te ku un 60% di e solo lo keda tapá dor di luna.

Rayonan solar ta sumamente dañino pa bo wowo i sigur durante di e eklipse parsial ta rekomendá pa usa glasnan ku filternan solar traha spesialmente pa protehá bo wowo durante di e.o. un eklipse. For di 2015 ta rekomendá pa usa glasnan spesial ku ta ISO 12312-2 ya ku esakinan ta produktonan spesialmente traha pa wak solo. Ta rekomendá pa sigui tur instrukshon ku tin riba e produkto manera ta indiká. Un otro opshon ta di usa un glas di las ku un shade di 12 òf mas i no mira mas ku 3 minüt den solo òf e eklipse.

Den kaso e glasnan ta kibrá, tin skur, ta raspá, ku buraku òf ta machiká no por usa esaki bou di ningun sirkunstansia. Mayornan supervisá boso yunan i no laga nan wak den solo sin e protekshonnan rekomendá. Bou di ningun sirkunstansia wak den un lèns di kámara òf usa brel di solo ni ningun otro tipo di artefakto pa mira e eklipse parsial.

E último eklipse parsial di solo, ku tabata visibel na Kòrsou, a tuma lugá durante di atardi lat di 8 di aprel 2005. Promé ku esei tabatin e eklipse di solo total inolvidabel dia 26 di febrüari 1998. Riba e dia ei, durante di dos pa tres minüt a bira skur durante di tramèrdia riba nos isla i na e momentunan ei temperatura a baha un par di grado. E siguiente eklipse parsial di solo ku ta visibel na Kòrsou lo tuma lugá dia 14 di òktober 2023.

E mapa di Merka ta mustra un liña manera un faha, kaminda ku e eklipse lo ta total. E liña aki ta kore for di parti nortwèst di Merka na estado Oregon den direkshon sùitost te finalmente riba estado South Carolina. Despues e área di totalidat di e eklipse ta sigui su ruta over di Osean Atlántiko.

Na Kòrsou mes luna lo kuminsá tapa solo 2:21 P.M. i gradualmente lo sigui tapa solo mas tantu ainda te 3:40 P.M. Na e momentu ei 63% di solo lo ta kubrí dor di luna. Chèk e gráfiko athunto pa mira un simulashon di apariensia di solo na e momentu ei. Despues di esei, luna lo sigui move bai i gradualmente mas i mas di solo lo bira visibel atrobe. Despues di 4:49 P.M. solo su apariensia lo ta normal atrobe.

Pa mas informashon por check riba "https://www.timeanddate.com/eclipse/in/curacao/willemstad?iso=20170821

E grafiknan athunto ta mustra lo siguiente:

Na Boka Tabla tabatin bastante hende pa sigui e eklipse total di 26 di febrüari 1998.

E mapa aki ta mustra ruta di e totalidat di e eklipse di 26 di febrüari 1998.

E totalidat di eklipse di djaluna awor lo move di man robes ariba pa man drechi abou riba e mapa aki.

E imágen aki di un simulashon ta indiká kon e kombinashon di solo i luna lo ser mirá for di Kòrsou djaluna awor, dia 21 di ougùstùs.