24 i 31 di desèmber ta mitar dia liber

WILLEMSTAD.- Konseho di Minister a disidí ku ámtenarnan dia 24 i 31 di desèmber ta liber for di 12’or di mèrdia. Banda di esaki a disidí ku dianan 27 di desèmber i 2 di yanüari no tin trabou, basta ku trabou ta permití. Pues un total di 3 dia èkstra ku ámtenarnan ta haña liber.

Komo motibu pa e desishon aki gobièrnu ta bisa ku durante 2024 el a logra di duna servisio di nivel haltu na komunidat i ta orguyoso ku kolektivamente por bisa ku gobièrnu di e forma aki a logra un di su metanan. Tambe tabatin retonan ku segun gobièrnu el a logra superá konhuntamente. Gobièrnu ta gradesido na e empleado públiko ku apesar di di tur kos, el a sigui hasi su esfuerso na interes di komunidat.

Mas aleu ta bisa ku Konseho di Minister a tuma e desishon di duna 3 dia èkstra liber pa motibunan di efisiensia. Ta usual ku dianan 24 i 31 di desèmber ta duna e personal mitar dia liber basta e dianan aki no kai riba un djasabra. Ta bin aserka ku por antisipá ku riba djabièrnè 27 di desèmber i djaweps 2 di yanüari hopi ámtenar lo tuma un dia liber i ku ofisinanan di gobièrnu riba e dia aki lo no tin sufisiente personal.

Tambe, segun gobièrnu, eksperensia ta demostrá ku riba e dianan aki públiko ta hasi uso mínimo di e servisionan di gobièrnu. Den e kuadro aki gobièrnu ta spera tur ámtenar bèk na trabou djabièrnè 3 di yanüari yená ku energia pa inisiá ku nan trabounan den e aña nobo.