E medida ta entrante 26 yanüari awor

WILLEMSTAD.-Siudadanonan for di Kòrsou, komo parti di region di Karibe, tambe mester demostrá un tèst negativo di Covid-19 na nan yega na Merka si no lo no por drenta. Esei ta desishon ku Central for Disease Control (CDC) a emiti. E motibu prinsipal ku e instituto di salu merikano a duna ta debí ku e kantidat di kasonan ku ta keda registrá di Covid ta sigui oumentá ku sifranan alarmante.

Segun regla emiti pa CDC, tur pasahero ku ta yega Merka for di eksterior mester presentá prueba di tèst ku a hasi di Corona vírus. E pasahero mester presentá e tèst ku resultado negativo, promé ku e subi avion rumbo pa Merka. E medida aki ta drenta na vigor 26 di yanüari próksimo.

E kantidat di kasonan ta oumentando di un forma spantoso i den e kuadro aki a tuma e medida pa tur avion ku ta yega e aeropuerto Miami International na Florida. CDC tin preokupashon pa e ola nobo di e vírus ku aparentemente ta mas kontagioso ku esun promé.

Tur pasahero for di eksterior mester presentá un tèst di Covid negativo. Sea ku e pasahero ta yega Merka for di México, Gran Bretaña i tambe Karibe tur mester presentá un tèst negativo. E kompanianan di aviashon lo por pidi dispensashon pa paisnan unda e tèstmentu no ta sosodé na un manera adekuá.

E pasahero mester pèrkurá pa el a tèst pasando e PCR òf e ‘Rapid Antigen tèst.’ E informe ta indiká ku esnan ku a tuma e bakuna di Covid mester pasa e tèst na laboratorio tòg. CDC ta rekomendá pa hendenan ku regresá nan kas for di eksterior i keda den karentena boluntario entre 7 pa 10 dia.