WILLEMSTAD.- Tur grabashon di interogashon den kaso Maximus a pèrdè. Mr. Franken, a kuestioná kon por ta posibel tur e grabashonnan di interogashon di testigunan a pèrdè. “No ta riba kasèt a graba nan tòg?”

E sospechoso prinsipal den kaso Maximus ta eks minister George “Jorge” Jamaloodin akusá di a paga hende pa likidá e polítiko Helmin Wiels dia 5 mei 2013.

Jamaloodin a apelá e kastigu di 30 aña den e kaso aki ku el a haña den korte di promé instansia.

“Ta hopi straño kon tur e interogashonnan ku a hasi di e testigunan a pèrdè. Ta kon tur interogashon elektróniko por a bai pèrdí. Mi tabatin gana di tende algun dje interogashonnan manera esun di Boutisma (ruman hòmber di Luigi “Pretu” Florentina sospechá di a paga e asesino di Wiels), pa mi sa kon esaki a bai. Meta di e interogashonnan aki tabata pa tin transparensia. Pero awor ku tur a pèrdè, ta un preokupashon, pasobra no por evaluá e deklarashonnan di un forma transparente”, mr. Franken a terminá bisando.