WILLEMSTAD.- Hues a posponé kaso di e akusado Rolangelo Eranio (36)  pa falta di rapòrt sikiátriko, sikólogo i testimonio di algun testigu mas.

Eranio ta keda akusá di a sende e víktima  R. Casimiri na kandela intenshonalmente, despues ku el a dal’e ku un líkido flamabel.

Tambe e ta keda akusá di a kousa daño ku e kandela na dos menor ku tabata para den serkania.

Tur esaki a tuma lugá dia 3 di yüni último na e toko chines den Zuiderzee Straat Suffisant.

E víktima Casimiri a sufri kemaduranan serio ku a pone ku el a fayesé na un klínika na Colombia.

Eranio ayera a presentá den sala di korte basta trankil.

E mayornan di e víktima tambe tabata presente ku algun familiar. Fiskal Out ku e trese e akusashonnan dilanti, a duna di konosé ku e akusado ta un persona ku mester keda interná riba e sistema di TBS ( Terbeschikkingsteling), pero lástima nos no tin un tipo di instituto asin’aki na Kòrsou.

Na momento ku fiskal tabata relatá esaki, e akusado a hari di kual hues a puntr’e kiko ta  asina prèt.

Segun Eranio, na Ulanda el a pasa den tur sorto di e institutonan ei, paso e ta konosí pa tipo di kasonan asin’aki na e pais.

El a bisa mas aleu ku e ke bai un klínika. Na e momento ei e públiko patras den sala a murmurá riba loke e akusado a bisa.

Riba e murmuramentu aki e akusado a bisa hues Edelenbos ku e ta tendiendo un tiki bochincha patras pero e ke bisa ku mester pensa bon kon tin ku bai atendé kuné den su bida.

Segun e akusado mas aleu, despues tur hende lo bai sa dikon sierto hendenan a wòrdu sende na kandela.

Tambe el  bisa ku e ta sera pero, ta tende tur kos ku ta wòrdu papia eifó.

Eranio a bolbe ripití ku kada ken  tin ku pensa kon ta bai atendé kuné despues.

El a bisa ku el a pasa edat di Kristu i ku aworakí su mente ta den segunda guera mundial.

E akusado ta sera den e sekshon di Foba na SDKK i ta haña i ta wòrdu trata ku medikamentu.

Korte a yega na un akuerdo ku dia 8 di desèmber próksimo lo bini bèk pa wak e “staan van zaken” di e kaso i dia 19 di yanüari e kaso lo keda trata den su kontenido.