Hato ta refutá informashon inkorekto

WILLEMSTAD.- Minister di Hustisia Shalten Hato ta refutá ponensianan ku personal di LBD (Landelijke Beveiligingsdienst”) no por solisitá riba funshonnan ku a habri den Kuerpo Polisial di Kòrsou (KPC). Den kuerpo polisial tur hende tin derecho pa solisitá riba tur funshon ku habri, minister di Hustisia Shalten Hato ta splika.

Tabata parlamentario pa partido PAR, Ana Maria Pauletta ku durante e ora di pregunta (“vragenuur”) riba e situashon den LBD a trese dilanti ku ta stroba e funshonarionan di LBD pa solisitá riba funshonnan ku habri den kuerpo polisial. “Ta lamentabel ku ta bisa ku ta stroba funshonarionan di LBD pa solisitá. Tur hende ku ta kere ku e ta kumpli ku e eksigensianan por solisitá”, Hato ta deklará

Segun e minister semper tabata e kaso ku tur hende por a solisitá i gabinete Pisas II no a stroba niun hende pa solisitá riba niun funshon. “Al Kontrario, a asta traha riba mobilidat pa asina stimulá ku funshonarionan por kambia di funshon. E ta lamentá ku tin hende i asta sindikatonan ku ta bisa ku e funshonarionan di LBD no por solisitá pasobra e no ta kuadra ku bèrdat.”

El a sigui bisa ku ta trahando un plan di formashon pa introdusí den KPC, pero sin e plan aki mes tur hende por solisitá pa kualke funshon den polis òf otro servisionan di hustisia. Hato sinembargo no por a duna sifranan konkreto di kuantu funshonario di LBD a solisitá riba un funshon den KPC, manera Pauletta a pidi pe.

El a bisa si ku diferente funshonario di LBD a yega di solisitá i asta bai korte pa eksigí pa nombra nan den sierto reunion ku ta eksigí un formashon di polis ku nan no ta disponé di dje. E minister ta kere ku ta debí na esaki ku tur informashonnan ta sirkulá ku nan no por solisitá riba sierto funshon.

Pago

Un otro pregunta ku Pauletta a hasi ta relashoná ku e echo ku mayoria funshonario di LBD a yega nan plafòn salarial. Riba esaki Hato a bisa ku ta den henter e aparato gubernamental tin hopi ámtenar ku a yega nan plafòn. P’esei e minister ta konvensí ku mester hasi algu na e kondishonnan laboral di aparato públiko.

“Awor ku mi ta minister di Maneho di Gobernashon, Planifikashon i Servisio Públiko ku mi a bisa e servisionan ku mester bai atendé e situashon aki. Mi sa ku lo ta difísil den e 6 lunanan ku a sobra di e aktual periodo di gobernashon, pero no por t’asina ku un hende ta 30 aña largu den su máksimo i ratu ratu ta haña un pida lumpsum.”

E minister ta sigui bisa: “Nos tur ke bai dilanti finansieramente i den nos trabou, lòs for di oumento di kosto di bida. Antayera mi a bai supermerkado ku mi yu i ta mira ku preisnan ta subi kontinuo. E ta hasi doló. Indeksashon ta duna espasio, pero mester sòru ku den gobièrnu ta traha riba mihó kondishonnan laboral pa por sigui atraé profeshonalnan.”