Tur hende tabata koperativo ku Korte Komun durante krísis korona i “Lockdown”

Lokal

Di akuerdo ku hues Thea Lautenbach

WILLEMSTAD.- Korte Komun riba e Islanan di Karibe Ulandes no tabatin òf te hasta niun kritiká den e periodo di krísis di Coronavirus aki, i “lockdown”. Tur hende tabata hopi koperativo i a aseptá e limitashonnan ku tabatin pa Korte Komun por a sigui funshoná i atendé kasonan riba vários nivel. Pero tambe Korte tabata hopi fleksibel ku término di tratamentu di kasonan si esakinan no por a tuma lugá dor di Corona, e abogado por a alkansá huesnan i visevèrsa. Esaki ta loke ku mr. Thea Lautenbach a duna di konosé durante di instalashon di su mes persona komo hues di Korte Komun i sinku otro kolega mas di dje.

Sra. Lautenbach a para ketu riba Korte Komun den e periodo di Corona, kaminda nan tambe a keda konfrontá ku mester a sera e edifisio di korte den luna di mart, dor di kual no por a trata kasonan. Ya kaba tabatin retraso den tratamentu di kasonan, i dor di Corona ku e medidanan, mas retraso esaki a trese kuné.

Niun hende por a bula pa St. Maarten, Bonaire òf Aruba pa trata kasonan. Kasonan a para, ku eksepshon si partidonan skohe pa sigui ku e kaso por eskrito, esta nan tin di entregá nan nota di defensa na hues.

Korte Komun a hañ’e ta buska alternativanan pa tratamentu verbal via di sistema di komunikashon digital.

Sinembargo debí ku no tabatin kasonan, sentensianan ku tabatin retraso, huesnan tabatin mas tempu pa traha duru riba retraso di sentensianan. Esei a logra. E sistema di kasonan digital den korte sivil por a sigui na e islanan di Aruba, Bonaire i St. Maarten.

Ora Korte Komun por a habri su portanan atrobe, kasonan físiko por a tuma lugá i tambe por a kuminsá ku biahenan di trabou primeramente pa Bonaire, despues St. Maarten i for di yanüari 2021, Aruba.

E bunita ta ku medionan moderno tòg a duna e posibilidat pa kasonan digital por a tuma lugá. Asina tabatin interakshon di partidonan ku hues. Apesar dje medionan, tòg tabatin difikultat ku e sistema digital tin ora, pasobra internèt ta kai afó, òf tin biaha no por a skucha partidonan ku konsekuensianan e kasonan tòg tabata tuma basta ora. Manera ariba mr. Lautenbach a bisa, tòg partidonan tabata hopi koperativo ku Korte Komun.