...Foto di 14 òktober 2019 na momentu ku a detené e agente polisial M.M.M. i ta bayendo Landsrecherche kuné...

WILLEMSTAD.- Un eks-polis di inisial M.M.M. ku dia 14 òktober 2019 a keda detené den e robo di 600 kilo na warda di reshèrshi, a bolbe keda arestá, pero e biaha aki na Hulanda dos siman pasá. Ta ayera ministerio públiko ta hasi menshon ku den koperashon KPC i RST, e awor èks-polis a keda detené na Hulanda den investigashon di robo di droga na warda di reshèrshi na òktober 2018.
E tim di investigashon Inex2.0 a yega for di Hulanda ayera.
Riba 18 i 22 di
yanüari último, despues ku na desèmber 2021 a hasi vários detenshon na Kòrsou, a hasi
detenshonnan na Hulanda tambe. Ta trata di dos hende hòmber di 27 i 33 aña di edat ku a keda detené ku e intenshon di ekstraditá nan pa Kòrsou.
Un di e sospechosonan ku a keda detené na Hulanda ta un èks agente polisial di Kuerpo Polisial di Kòrsou. Ku e aresto di e hòmber aki, e tim di investigashon i Ministerio Públiko ta spera ku nan a detené e serebro tras di e robo aki.
Promé ku e arestonan a tuma lugá, e wes komisario na Kòrsou a dikta un órden di detenshon pa e sospechosonan pa un periodo di 8 dia. Mientrastantu, den ámbos kaso, a prolongá e plaso aki
ku 8 dia mas.
Dia 14 di òktober 2019, eksaktamente un aña despues ku a kometé e robo, outoridatnan a detené e èks-agente polisial aki, huntu ku un otro hòmber. Pero despues di interogashon, ámbos persona a keda pone den libertat. E tempu ei a detené M.M.M. den su kas na Seri Kandela. Na momentu ku a detené M.M.M. na 2019, ya el a sali for di kuerpo polisial, i tabata traha na un kompania di utilidat. Esaki a hala hopi atenshon kon M. Ta laga kuerpo polisial, i bai traha na e kompania di utilidat. El a tuma su retiro djis despues di e robo na 2018.
E mesun agente aki tempu ku e tabata den Kuerpo Polisial mester a bai forma parti di e tim di aresto, pero komo ku e tabata envolví den un insidente di tiroteo, e no por a forma parti dje tim mas. E tiroteo a tuma luga den área di Zuikertuintje kaminda M. tabata ku su pareha kende tambe ta un agente polisial, i nan a pasa basha bala riba nan. Aparentemente lo ta vinkulá e agente aki di lo tin konekshon ku baho mundu, esta gènnan.
M.M.M. su aktuashon i komportashon a hala atenshon di outoridatnan for di 2019. A sigui su pista, i despues di tres aña i algun luna, a detené e eks polis aki te na Hulanda.
Tin tres sospechoso ku a keda detené na Kòrsou na desèmber 2021, i ketu bai nan ta den aresto preventivo den SDKK. Dia 7 yanüari di e aña aki nan a drenta 60 dia di enkarselashon.
E tres sospechosonan ta: un hòmber di 38 aña ku a keda detené dia 20 di desèmber. Ta sospechá e hòmber di benta di e droga hòrtá, pero tambe di envolvimentu den ehekushon di e robo.
Dia 15 di desèmber a detené un hóben di 20 aña e ta ser sospecha di ta envolví den robo dje lote.
Su siguiente dia 16 di desèmber a detené un hòmber di 38 aña ku tabata enkargá pa bende e blòkinan di e lote di 600 kilo.
Den luna di yüni di 2021 a detené 3 hòmber di entre 25 pa 60 aña den e kaso aki. Nan ta wòrdu sospechá di trafikashon di droga. E tres hòmbernan último aki a keda pone den libertat.
Pues awor tin 5 sospechoso detené entre nan e eks agente polisial.
E investigashon ta kontinuá na Kòrsou i Hulanda i no ta ekskluí ku lo tin mas
detenshon. Den interes di e investigashon Ministerio Públiko ta bisa di no por duna mas informashon na e momento aki.