WILLEMSTAD - Den kuadro di e situashon reinante relashoná ku Covid-19 riba nos isla, Kuerpo Polisial, pa garantisá protekshon di tantu e siudadano komo e personal di polis, ta introdusí entrante awe 31 di ougùstùs algun medida.

Ta urgi tur persona ku mester akudí na un warda òf kantor polisial, pa tene kuenta ku nan.

-Tur persona ku ta bishitá wardanan di polis mester tin un “mondkap” bistí;

-Manera ku drenta warda mester apliká regla di higiena dor di limpia man ku líkido di desinfektá ku tin na porta;

-No ta permití mas ku 3 persona den salanan di espera di warda i kantornan polisial. Si tin mas ku 3 persona paden, e otro klientenan mester keda warda pafó òf yama pa traha sita;

-Si no ta pa kasonan di urgensia grandi ku mester yega un warda di polis, ta supliká tur siudadano ku mester di yudansa di polis, pa yama sea sentral di polis pa kasonan urgente (911), Callcenter di polis pa kasonan no urgente (917) òf e warda di polis;

-Ta pidi tur siudadano pa sigui instrukshonnan ku wòrdu duná den wardanan di polis estriktamente.

Kuerpo Polisial ta gradisí komunidat kompletu di antemano pa e komprenshon i e koperashon pa yuda nos mantené e kuerpo salú pa por sigui sirbi i protehá bo tur dia i tur ora.