ORANJESTAD.- Gobièrnu di St. Eustatius a kuminsá ku un kampaña di konsientisashon. For di promé di òktober di e aña aki St. Eustatius ta prohibí tur ‘single use plastic’. Ku ta nifiká kùp, tayo, saku, bestèk òf otro tipo di plèstik ku ta keda usa un bia so.
Konseho insular a aseptá un lei nobo di 4 di Mart di e aña aki relashoná ku esaki. El a drenta na vigor 1e di Aprel di e aña aki. Pero gobièrnu a duna negoshinan algun tempu pa adaptá ku e reglanan nobo. Ku ta nifiká ku nan tin te promé di òktober pa bende tur artíkulonan di plèstik di ‘single use’ for di nan stòk.
Gobièrnu di Sint Eustatius a duna di konosé ku for di promé òktober e periodo di grasia riba ‘single use plastic’ ta terminá. Ku ta nifiká ku tur itemnan di ‘single use’ plèstik ku negoshinan tin den stòk dia 1e di òktober 2020 tin ku wòrdu destruí.
Segun gobièrnu esaki ta un paso nobo pa redusí e kantidat di shushi riba e isla. I ku esaki e isla por krea un medio ambiente mas limpi pa e abitantenan i su bishitantenan. E lista di produktonan ta basta largu i ta inkluí entre otro: saku di plèstik, pipa, kùp pa bebe, baki di foam i kònfèti.
Statia no ta e promé isla den reino Hulandes ku ta prohibí ’single use plastic’. Saba i Boneiru tambe a instalá leinan asina. Na Kòrsou ta papia pa basta tempu pa un lei asina, pero te ainda parlamento no a aseptá un lei manera na islanan BES.

PORTRET
Imahen ku gobièrnu ta usa den kampaña di konsientisashon.