Segun lei

WILLEMSTAD. - Un shofùr studiante (18) basta mal kontentu a presentá den sala di korte, pa motibu ku e no tabata akuerdo ku e but risibí durante kontrol di tráfiko.

E hóben shofùr a bisa ku el a haña but , pa motibu ku e no por a mustra su reibeweis na momento ku outoridatnan a puntr’e pa esaki.

El a splika ku semper e tin su reibeweis huntu kuné,pero nèt e dia ei el a kambia di vehíkulo,  e reibeweis a keda den e un otro outo.

Segun e shofùr el a trata tur manera na splika e agentenan esaki, pero sin resultado.

Fiskal a duna di konos’é ku pa lei un outomobilista semper mester tin su reibeweis huntu kuné .

Segun fiskal ta kompletamente kastigabel pa lei,si un agente polisial para un outomobilista  durante kontrol di tráfiko  i e no ta disponé di su reibeweis na e momento ei .

Fiskal a bisa ku  esaki ta pone ku outomátikamente e shofùr lo haña  but.

E hóben shofùr a saka su reibeweis i mustra korte .

Tantu fiskal komo wes a tira  bista riba esaki i a tuma nota ku enberdat e reibeweis ta na òrdu, promé ku e fecha ku polis a par’e.

Pero mirando ku e shofùr no tabatin su reibeweis na momento ku polis a par’e, fiskal a demand’é na 50 florin but.

Wes den su desishon a disidí otro. Segun wes e shofùr a haña un but paso e no tabatin su reibeweis. Pero wes a tene kuenta ku e shofùr su reibeweis tabata válido i a bisa ku pa e bia aki, e ta apsolv’é e di e but.