WILLEMSTAD.- EXTRA su vershon di ayera mainta no a kambia, esta ku “stembiljetnan pretu ku blanku (Black & White) ku a ser yená korektamente a ser kontá komo votonan válido”. Esei ta algu ku e propio presidente di Konseho Supremo Elektoral, sr. Pacheco Römer a deklará na EXTRA djárason durante e enkuentro ku prensa i partidonan polítiko, i kual a keda rekonfirmá ayera djabièrnè pa otro miembro dje prestigioso órgano aki. T’asina ku no opstante ku tin lesadónan a ekspresá un tiki duda den loke nos a publiká, nos a bolbe tene kontakto ku KSE, i por bisa ku e vershon no a kambia.

Pa nos poné na un manera simplista ku tur hende por komprondé:

Tabatin diskushon riba eksistensia i valides di bietenan pretu ku blanku. Den deklarashon pa prensa e presidente a duna di konosé ku ora ku el a konsultá ku presidentenan di tur e 117 urnanan, nan a dun’é di konosé ku nan no a topa ku bietenan pretu ku blanku (inválido). Naturalmente esaki a intensifiká e diskushon aun mas pa motibu ku tin hopi votadó ku a hura ku nan a haña biete pretu ku blanku.

Despues ku partidonan i tambe algun siudadano a entregá nan opheshon na KSE djárason atardi den WTC, ainda tabatin hendenan ku no a keda satisfecho i konsekuentemente presidente di KSE a ofresé pa habri algun dje paketenan ku tabata wardá i seyá.

Awor loke partidonan no a para ketu na dje ta ku KSE a habri paketenan di votonan ku tabata inválido. Pero for di presentashon i relato riba papel KSE a mustra ku no tabatin votonan inválido pretu ku blanku, sino votonan inválido pa e.o. mas ku un rònchi yená; sin rònchi yená; uso di otro koló di pòtlot; remarke riba e biete; bietenan sin firma; i bietenan ku stèmpel ku ta indiká “no usabel”. En total tabatin 1.132 voto inválido. Pues riba e lista aki no a papia di votonan inválido pa motibu ku nan lo ta “pretu ku blanku”.

Esei te motibu tambe dikon sr. Römer a bisa ku e no a mira bietenan pretu ku blanku. Es mas, por ta koinsidensia, pero for di esaki por konkluí ku tur voto riba biete pretu ku blanku tabata válido!

Ningun momentu KSE a habri pakete di votonan válido, i si nan a hasié probablemente lo a topa bietenan pretu ku blanku. I manera sr. Römer a splika nos bon kla: Si tabatin bietenan pretu ku blanku korektamente yená, nan a ser kontá komo votonan válido!