WILLEMSTAD.- Ayera durante di oranan di atardi departamento di inspekshon a hasi un bishita na e instalashonnan di Interpark.

Durante di un bishita a hasi un rekorido pa asina wak tur loke ku ta instalá i ku esakinan a keda hasí di un forma korekto i sin pone bida di ningun hende na peliger.

Delaster un wega den e parke a pasa e inspekshonnan ku éksito. Tur loke ta trata e weganan tabata na òrdu. A hala atenshon di e organisadónan riba algun detaye minimal, por ehèmpel lus ku ta kologá un tiki abou, kaminda falta mas iluminashon i tambe sierto kaminda ku bishitantenan mester kana a konsehá pa pone mas skruf ya e plachinan no ta lanta.

E promé fase di inspekshon a bai ku éksito i awor djadumingu e tim lo bolbe regresá pa e di dos parti di inspekshon ku mester tuma lugá anochi ora tur lus ta sendé.

Djadumingu awor e parke lo tin un dia habrí kaminda komunidat kompletu lo por konosé e weganan miéntras ku djamars awor e parke lo habri ofisialmente pa públiko pa 18’or di atardi.