....Nos tin un aña den pandemia di COVID. Toke de keda ta bai i bin. Mayoria negoshi i en partikular esnan di eskurshon di turista i lokal a wanta. No tin nada nada ta sosodiendo riba e tereno ei. Nos a yega di papia ku Emlyn Pietersz den pasado, kaminda nos di Djasabra por a sera konosí ku diferente programa ku e ta organisá pa turista i pa hende lokal. I e tambe ta sinti e temporada di ‘Lockdown’ aki fuertemente i ta spera ku pronto nos lo sali for di dje. Pero awor ku e situashon tei kiko por hasi ora kos por bai bèk un tiki na normal kiko mas por sosodé.

Algu horibel...

Emlyn Pietersz; Ta un kos horibel loke nos ta pasando aden. Bo ta wanta te kaminda bo por. Den añanan 90 a pasa den un vírus pero e no a ataká henter komunidat i tampoko henter mundu. E no tabata un pandemia pero un epidemia ku a asotá diferente barku krusero ku ta e kos prinsipal ku nos tabata traha kuné. Ku esei Emlyn a mustra ku el a yega di pasa den un situashon asina aki pa 3 pa 4 luna. No por a kome i bebe tur kos e tempu ei. Pero loke a pasa awor aki ta algu horibel. Si wak e for di aña pasá bin te awe, no solamente turista pero hopi operador di tour i hopi hende ku ta traha den turismo a kuminsá ta biba den e parti lokal tambe. E mes tabatin un aktividat ku un banko grandi ku mester a tuma lugá riba 29 di mart 2020. E siman promé mester a tuma e desishon di kanselá. Esei tabata e promé klap grandi ku el a haña. Tur kos tabata prepará, kuminda, lokalidat i asta pagá. I asina a sigui bai ku e turistanan tambe. E momentu ei tur hende ainda tabata optimista ku e kos lo a dura te mei òf yüni i yüli, pero no por imaginá ku mas ku un aña despues ainda ta den e mesun kos i ku kada bes e ta birando mas pió. Ta tende di variante aki i aya i e mes tin pesadia ku ta bin mas variante.

Mester ta kouteloso...

Tabatin un temporada ku a suavisá i algun turista a kuminsá bin, pero mester ta kouteloso tambe kon ta organisá e tournan. Hopi bùs a pone nan vehíkulo drumi, no a paga seguro mas i mester wak unda ta saka algun bùs ku por a kore. Hopi aktividat a para, hopi atrakshon a tuma un forma nobo di operá. I den tur e kosnan aki, tin yen di trahadó ku tin di sigui kobra. Tabatin atrakshon ku a sera mes, tin hotèlnan kaminda turista ta bai keda, na tambe mester tene kuenta ku distansia sosial etc., etc. I no sa ki dia lo habri bèk.

Te ki dia...

Emlyn ta duna konseho na sierto lugá i el a haña e pregunta di te ki dia e kos aki ta dura. E no por bisa esei. E por duna un pronostiko si basá riba data, ku tantu hende vakuná i ménos kontagio, pero e no por bisa ku e turista ku tin di bin Kòrsou ta pensa kon e por bin aki. E kompanianan di aviashon tambe por disidí di tuma medida. E por menshoná un kompania di aviashon grandi, unu hulandes ku ta den hopi problema.

Sobrebibí...

Hopi hende ta kere ku manera bai bèk na normal, ta habri porta i e turista ta basha drenta. Esaki segun Emlyn no ta bèrdat. E sa di hotèl kaminda ta hefenan mes ta limpiando kamber. Esei ta duna un indikashon ku kos ta hodidu. A kita hende for di trabou i duna ménos salario pa por sobrebibí. E mes konosé hende ku ta gana míles di florin i awor ta keda kontentu ku un òf dos mil florin. Taksistanan, lugánan ku ta bende suvenir, restorantnan, lamannan, hürdónan di stul etc., et. tur kos a para.

Ni lokal ta drei...

Riba e parti lokal, Emlyn a bisa ku awor aki ni esei no ta drei. E mes a purba for di aña pasá, pero dor di e ‘lockdown’ kada bes ta traha i plania un tour i despues mester sera i tin di duna sèn bèk. Dado momentu bo ta gasta sèn hasi propaganda i no ta haña ni e sèn ei bèk i tampoko ta generá entrada pa asina por skapa un tiki.

Purba diferente kuminda...

Pero si habri lokalmente Emlyn a bisa ku tin masha hopi kos ku por sosodé. Di Bándariba te Bándabou, e por keda 30 pa 40 dia i ainda bo no a kansa. Tin hopi parti bunita, historia, atrakshon, hopi kos ta mira, hopi kos pa pasa den dje. Nèt promé ku e ‘lockdown’ e tabatin un tour pa kome diferente kaminda. Nan lo a kuminsá na Boca Samí i kaba na Sint Willebrordus, Ascencion, den serunan  Rust en pad di bin bèk. E tour ei a kuminsá kana masha bon mes pero e ‘lockdown’ a bin i mester a para esaki tambe.

Den kontakto ku federashon mundial...

E ideanan aki segun Emlyn, el a kuminsá studia ku e federashon mundial kon pa ahustá bo produkto pa hende lokal mes por hasié. Na Rumania, Gresia i Italia nan a hasié. Nan a kuminsá sierto tournan di kome i purba kos di sierto region. El a hasié tambe pasobra e yu di Kòrsou ku nunka a bai tour no sa kuantu kos e Kòrsou tin. I dor di e komementu e ta para ketu i skucha. Ku e kuminda spesial ku bo ta a ofresé bo ta gana atenshon. Tabata un meks di kuminda di Kòrsou kuminda di otro nashon. Emlyn ta kòrda ku den un di nan asta tabatin patia stobá. Na Bándabou tin yen gremio ku ta hasi yen kos ku no ta hasi na otro parti di Kòrsou. Por ehèmpel na Flip tin e baile di Flip. Na Lelienberg tin hende ta kushiná e patia stobá. Tabatin un tipo di johny cake na St. Wilibrodus i tabata bai un hòfi kaminda tin kuminda internashonal. Ta un meskla di tur kos.

Emlyn komo miembro di federashon internashonal di turismo a bisa ku tur dia e tin kontakto ku nan. E úniko diferensia ta ku aki na Kòrsou ta dependé di avion òf boto pero den otro pais ta kore 2 ora i yega otro siudat. Den un pais grandi manera Oustria òf Alemania kaminda tin e fasilidatnan ei, e federashon ta konsehá e hendenan pa gana sèn for di hende ku por biaha ku trein, bùs, outo i asta ku left.

Konsiente...

E pandemia a kousa hopi daño pero tambe el a trese e konsientisashon den nos hendenan. Por ehèmpel Emlyn a bira konsiente kon e ta hasi kompra. Si ántes ta yena garoshi i ora fin di siman yega ta wak kiko a daña i benta afó. Awor ta piki loke mester i ora tin gana di kome ta kome loke tin den e eiskast.

Guia di turista lo sigui...

Emlyn Pietersz dos aña pasá a organisá un kurso grandi di guia di turista. Aña pasá e tabata kla pa kuminsá ku otro grupo pero e COVID a kai aden. E kier a hasié virtual pero e no a bai. E profeshon aki ta ku mester mishi ku algu i laga e hende wak. Por papia di Buraku di Tomasitu pero si no wak  e i mishi kuné, bo ta haña e sentido. Na Kòrsou tin asina tantu kos ku bo mester mira, por ehèmpel e Koran ku ta e beibel hudiu. Ora ta guia si bo ke splika kon ta traha palu di funchi mester por wak e karawara pa sa ta kon e ta, si ta papia di kadushi mester por wak esaki, bo para i flornan. Virtual e no a bai.

Personalisa... 

Asina habri Emlyn lo kuminsá mesora. I e tin plannan grandi pa lokalmente e hende sintié ku ta na un otro pais e ta pero den su mes lugá. E interes den nos mes pais a krese masha hopi mes. Prinsipalmente e parti di hike, subi seru, bai kamindanan no konosí, Newtown dilanti di Jeremi a bira un parti masha atraktivo pa hende bai wak e ruinanan di ingles ku ainda tin einan. tur riba Tafelberg ku hende lokal ta keda impreshoná kuné. E tin e parti Oostpunt. Tournan ku ta bai Shon Martin, playa Charombu, sufisiente lugá kaminda e lokal por disfrutá, Pa yüni aki, si tur kos kana bon por buk asta un tur manera un biahe pero na Kòrsou. Lo keda 4 anochi pariba i 4 anochi mei mei di Kòrsou. Ta manera un turista e hende ta pasobra e ta keda den hotèl i finalmente 5 anochi na Bándabou. Lo tin show i hopi mas. Ta manera bai un otro pais pero na Kòrsou. Lo tin show folklóriko, kaminda por kumpra kos manera tiendanan chikí pa eksperensia. E federashon internashonal ta bisa ku mester tin hopi personalisashon, Hende no ke biaha i hasi aktividat den grupo mas. Personalisashon di turismo lo bai kue poder e próksimo 20 aña sigur. Mester konsentrá riba un grupo ku ta indiká kuantu personalisashon nan ke. Nan no ke algu ku hopi hende, pero kisas un famia ku 4 yu i asina ta personalis’é i no ta bai huntu ku grupo di mas di 40 hende. Nos ta drenta e era di bai personalisá tur aktividat.