WILLEMSTAD.- Un turista lo no haña un bakuna aki na Kòrsou. Bakunanan kontra COVID-19 ta remedi ku a kumpra pero ta destiná grátis pa komunidat di Kòrsou so, inklusive indokumentadonan. Tin motibunan práktiko tambe dikon un turista lo no por risibí un bakuna kontra COVID-19 aki na Kòrsou. Esei EXTRA por a komprondé for di un splikashon duná dor di e epidemiólogo dr. Iralice Jansen ayera na inisio di e trayekto di bakunashon aki na Kòrsou. E sentro di bakunashon lo ta den Poliklínika di SEHOS.

Manera nos a introdusí bisando kaba, un turista no ta bini na remarke pa ser bakuná. Primeramente pasobra e ta medikamento grátis pa poblashon. Ta bini aserka ku e bakuna aki tin dos parti (Pfizer). E di dos parti bo tin di pasa un tres siman despues ku bo a pasa e promé angua. Esei ta nifiká ku e turista ya lo no ta riba nos isla, pues no tin sentido pa e pas’é.

Pa loke ta indokumentadonan, a disidí kaba ku e grupo ei lo ser bakuná ya ku di un òf otro forma nan nan a bira parti di e komunidat aki. Naturalmente nan lo tin di proba si ku nan tin un periodo largu riba nos isla, esei pa evitá ku un turista lo por probechá dje situashon i ser bakuná. Pero outoridatnan tin manera pa kontrolá un ke otro, segun sra. Jansen.

Den su presentashon sra. Jansen a ekspresá gratitut na tur esnan ku di un òf otro forma a duna nan koperashon pa e proseso aki por a bira realidat.

Dòkter Jerry Semper:

Di su parti dr. Semper a splika ku den e trayekto aki di bakunashon e lo ta e médiko finalmente responsabel pa loke ta e proseso médiko. Esaki ta nifiká e protokòlnan médiko for di momentu di bakunashon i te na final pa si a kaso algu no kana bon.

Na kada sitio di bakunashon (Poliklínika Sehos i Ana Paviljoen) na tur momentu lo tin dos médiko presente. Por sierto, tin un grupo di 30 médiko entre dòkternan di kas i spesialista ku a duna nan tempu pa partisipá. Esaki ta enserá ku nan lo ta kla pará na momentu ku e persona ku a kaba di bakuná tin di keda pa opservashon durante 15 minüt promé ku e bai kas.

Dr. Semper lo fungi tambe komo e kordinadó entre e 30 médikonan ei. El a ekspresá gratitut na su koleganan ku ta sostené e proyekto importante aki pa komunidat.

Komo parti di e tim di bakunashon tambe tin boluntarionan di Krus Kòrá. Nan lo t’ei pa si a kaso mester duna promé asistensia.