WILLEMSTAD – Turistanan a kuminsá hasi mas i mas pregunta riba e aspekto di seguridat na Bándabou. EXTRA a tuma nota ku entre otro riba wèpsaitnan ku ta duna informashon riba destinashonnan turístiko mas i mas pregunta ta surgiendo riba seguridat general na Kòrsou pero en partikular na Bándabou.

Por ehèmpel tabatin pregunta di un grupo ulandes ku ta bin keda próksimamente na Bándabou pa kua nan a spar hopi den último lunanan, ku a puntra entre otro riba Facebook si e área ta sigur. “Nos a bin ta tende di diferente kaso ku a tuma lugá último simannan i nos kier mas informashon riba e situashon. Nos a tende ku tin atrako i tambe kibramentu di outo kaminda ta bai ku pertinensha di un gran kantidat di bishitante. Nos kier un konseho pasobra no ta nos intenshon pa ora nos bai laman nos bai ku tur kos pa nos mes kuida nan. Esmas, ora nos bai sambuyá nos no por baha ku tur kos den laman tampoko”, asina un di nan ta bisa.

Un otro persona a puntra si ta bèrdat ku hasta ora e malechornan bai ku bo pertinenshanan nan ta hasi bo daño físiko aserka. Nan ta referí ku tin biaha den atrakonan, abusadornan despues ku nan a haña tur kos kaba, ta dal nan víktimanan. E preguntanan ta demostrá ku e kantidat di kaso di violensha kontra hende lokal pero tambe turista ta yegando merkadonan turístiko importante pa Kòrsou. Pa hopi tempu tin e impreshon ku no ta hasiendo lo máksimo pa duna seguridat na turistanan en general. Kada pasa tantu tempu e kasonan ta baha pero no tin kontinuidat. A menshoná ku entre otro Politur lo bai haña un ròl mas aktivo den áreanan turístiko pero falta di sèn a pone ku e organisashon a baha su aktividatnan na diferente okashon. Últimamente ta bolbe papia pa duna e organisashon aki un ròl mas aktivo den seguridat di turismo,

Den algun sektor di turismo tin prekupashon pa e tendensha kaminda turistanan ta birando víktima. E aña aki tabatin diferente kaso kaba. Outoridatnan a aktua diligentemente den e kasonan aki despues ku nan a tuma lugá di manera ku por a minimalisá e impakto. Pero e pregunta ta kiko ta hasiendo pa ta mas preventivo den e tipo di situashonnan aki sigur ku awor aki mas i mas pregunta ta surgiendo.