WILLEMSTAD.- Komo parti dje medidanan ku gobièrnu di Kòrsou a disidí ku lo keda introdusí tin tambe un seguro pa turistanan ku ta bini aki pero tambe un tèst anti-gene. Esei pa eventualmente kubri nan gastunan di malesa den kaso ku nan bira malu. Esei EXTRA por a komprondé for di deklarashon di dr. Izzy Gerstenbluth.

Segun e epidemiólogo, seguro obligatorio semper tabata un punto di diskushon. Djis pensa si un turista a yega aki i no opstante e tabatin un tèst ku a sali negativo, pero tòg e bira malu i tin di keda interná. Den kaso ku e mes no a sera un seguro tòg tin e seguro aki pa kubri su gastunan. I di akuerdo ku nos sistema di kuido, si un persona bira malu i mester keda interná, ta dun’é e servisio i na kaminda ta wak ta ken ta paga. Pues si un persona asina no tin seguro, e gastunan ta keda pa nos aki na Kòrsou.

Lo por ta bien posibel ku un seguro lo hasi un biahe pa Kòrsou ménos atraktivo, pero e no ta algu nobo pasobra na Aruba esei ta e kaso kaba i turistanan ta bai aya.

Pa loke ta e prueba anti-gene, segun Gerstenbluth bo mester komprondé ku ne momentunan aki tin variantenan di COVID tambe ku a lanta kabes. E variantenan aki por pone ku nos kasonan ta oumentá i ku konsekuentemente Kòrsou ta ser poné riba e lista negativo di Merka i otro paisnan. Pues ta importante pa hasi e tèst ei tambe.

Di su parti Promé Minister di Kòrsou sr. Eugene Rhuggenaath a duna di konosé ku enbèrdat ku e medidanan adishonal aki lo por hasi Kòrsou ménos atraktivo, pero di otro banda no ta kosnan deskonosí den e mundu di turismo. Mester konsiderá ku si tin tur e kondishonnan ei, esta PCR-tèst, tèst anti-gene i tambe un seguro, ta hasi ku nos merkado ta bira mas ‘safe’. Pero lo ta bon pa bisa ku den kaso ku tin medidanan adishonal manera esakinan, Hulanda lo sinti su mes muchu mas konfortabel i asta dekretá kódigo hel atrobe pa Kòrsou.

Pero segun Rhuggenaath, e por komprondé ku kisas e lo ta un gastu adishonal, pero kontra esei e persona por pasa muchu mas plasentero den un ambiente ‘safe’, e lo por disfrutá di e loke Kòrsou tin di ofresé. É lo sa ku no solamente tin Sun Sand and Sea pa ofresé sino tambe aventura, historia, museo etc. Pues di un banda e lo por parse ménos atraktivo, pero si mira e sifranan ku Kòrsou ta registrando den e periodo aki di COVID-19, konsiderando e diversidat ku tin na aktividat e lo keda den balansa.
Ademas a hasi un apelashon riba e sektor tambe pa informá nan klientenan di e medida i prinsipalmente dikon, ku ta pa nan propio seguridat. Sigur esei ta e kaso pa hendenan ku ta aki kaba i tin intenshon di keda pa un periodo largu.