WILLEMSTAD.-  Ayera korte di promé instansia a trata kasonan di atrako riba turistanan, ku tabata tuma lugá na vários lugá di estadia na Bándabou. E akusadonan tabata atraká nan víktima i uza bate di baseball, arma di kandela i tambe machete pa menasá nan.

Loke tabata hasi e kasonan mas kruel, ta ku e akusadonan tabata kap nan víktimanan ku machete i laga nan tur na sanger.

E dos rumannan Jeaderon Vrutaal (24) i Jearinelio Vrutaal (25) huntu ku Goumirsen Aitatus (20) i Shandell Hortencia (21), tabata esnan ku Ministerio Públiko ta akusá di ta responsabel pa e 7 kasonan  di atrako.

Dia 16 di aprel 2016 e akusadonan a bai na  Hilton Apartments. Aki nan a bati na porta i ora e turista a habri esaki,  un di e akusadonan a dal e ku machete den su kabes i habri esaki na herida.

Segun deklarashon di e turistanan, e malechornan a puntra mesora unda e yabi di e kaha fuerte ta. E víktima a rekonosé Aitatus i dos otro hòmber mas  durante konfrontashon di foto.

Doño di e apartamentu a bisa ku Aitatus a kore stazje na  e apartamentunan i tabata sa presis ku tin kaha fuerte den e kambernan.

Aitatus  atmití esaki, pero a ninga di ta esun ku a kometé e atrako.

Segun e relato di Hues, Hortencia a deklará na polis ku ta Jearinelio alias Lonchi ta esun ku a bula riba e turista. Segun Hortencia, Lonchi a bis’é ku e no ta haña nada pa motibu ku el a kore bai.

Hues a relatá na Hortencia, ku a haña potrètnan di arma, bala i sèn de su telefòn.

Riba esaki e akusado a hari i bisa ku ta arma di “airsoft”  i ta gewon e tabatin nan den su telefòn. Mirando ku Hortencia a hari, hues a bira indigná i a  splik’é ku ta kosnan hopi serio.

Despues di e atrako aki, un pareha di edat tambe a keda atraká pa e grupo. E víktima a deklará na polis ku e tabata sintá den su pòrch ora ku direpente 3 hòmber a kore drenta kara tapá.

Un di nan a dal e ku machete i kap e na su kabes lag’é tur na sanger.  Nan a batié, skòp e i lastr’é hinka de kamber. Segun e víktima, tabatin dos hòmber rasta kara tapá, di kual nan a grita “money money”.

Hues a relatá ku Aitatus a deklará na polis ku ta e rumannan Vrutaal ta esnan ku a bai paden i kometé e akto aki. Ora nan a sali fo’i dje kas, nan a bisa ku nan no a haña nada di balor i ku nan a kima e pañanan i hanskunnan ku nan a uza, segun Aitatus.

E akusado a ninga e deklarashon aki. El a bisa ku ta reshèrshi a pone preshon riba  dje i el a gaña algu pa nan baha fo’i dje.

Segun hues mas aleu, un otro pareha ku tabata pará na parada di bùs na Westpunt, tambe a keda atraká pa un  di e akusadonan. E víktima maskulino a konta, ku e i su señora tabata pará ta warda bùs, ora ku nan a mira un hòmber kara tapá ku rasta kana bin riba nan. E hòmber a kue su tas tene pero e no a laga bai. Aki e hòmber a saka machete i kap e kuné na su man.

Segun e víktima, nèt na e momento ei un outo tabata aserkando i a kuminsá pita. E malechor e ora ei a saka kareda i kore bai.

E shofùr di e outo a rekonosé Jeadron komo e atrakadó, pa motibu ku un ratu promé el a kaba di  mir’é ta kana den kaminda direkshon pa e parada di bùs, ku e mesun pañanan.

Hues mas aleu a relatá di turistanan ku a keda atraká ku machete na San Pedro ku arma, den Bùngalo kaminda e víktimanan a haña moketa den kara i tambe na Boca Tabla.

Tur esakinan e akusadonan ta keda akusá pe. Hues a bisa di ta tuma nan hopi na malu pa nan echonan.